NASDAQ birjasida Tesla aksiyalari narxi 19-aprel kuni 6,5 foizga pasayib, 691,96 dollarni tashkil etdi. Qimmatli qog‘ozlar bir kun oldingi savdo kunini 739,78 dollar bilan yopgan edi. Toshkent vaqti bilan 20:30 ga qadar aksiya narxi 713,8 dollarga tenglashgan.
Bloomberg xabariga ko‘ra, aksiyalar bahosi Texasda Tesla S elektrokar bilan yuz bergan avtohalokatdan keyin tushib ketdi. Shtatning Vudlends shahrida Tesla elektromobilining katta tezlikda daraxtga urilishi natijasida ikki kishi halok bo‘lgan edi, ularning biri mashinaning old o‘rindig‘ida, ikkinchisi esa orqa o‘rindiqda bo‘lgan. Katta tezlikda harakatlanayotgan avtomobil burilishga ulgurmay, daraxtga urilib, yonib ketgan.
Politsiya avtomobil boshqaruvida hech kim bo‘lmagani, harakat chog‘ida avtopilot funksiyasi yoqilganmi yoki yo‘qligi hali ma’lum emasligini aytgan.
Autopilot yoki Full Self-Driving (FSD) funksiyasi bu hozirda Tesla’ning kengaytirilgan paketida 10 ming dollarga sotilayotgan avtomatlashtirilgan haydash tizimidir. Bu funksiya faqat haydovchining yordamchisi vazifasini o‘taydi va avtomobilning to‘liq o‘zini o‘zi boshqarishini ta’minlamaydi.
Keyinroq Ilon Mask Texasda avariyaga uchragan Tesla elektromobilida avtopilot funksiyasi yoqilmaganini ma’lum qildi.
“Hozirga qadar olingan ma’lumotlar avtopilot yoqilmagani va ushbu avtomobil uchun to‘liq avtomatlashtirilgan haydash tizimi sotib olinmaganini ko‘rsatmoqda”— , deb yozdi Mask Twitter’da.
Avtohalokatdan so‘ng Tesla aksiyalari narxi tushgacha Forbes reytingiga ko‘ra, Maskning boyligi 5,1 milliard dollarga kamaydi. 20-aprel kuni ertalab uning boyligi 174,6 milliard dollarni tashkil etdi. Mask dunyodagi eng boy odamlar ro‘yxatida uchinchi o‘rinda turadi.
Izoh (0)