Firibgarlar Finlyandiya va boshqa bir qator Yevropa Ittifoqi mamlakatlarida qiymati 14 milliard yevrolik mavjud bo‘lmagan COVID-vaksinalarni sotib olishni taklif qildi. Bu haqda Yevropa Firibgarlikka qarshi kurash byurosi (OLAF) direktori Villi Ityalyaga tayanib “Korrespondent.net” xabar berdi.
“Biz vaksinaning Finlyandiyada ham taklif qilingani haqida bilamiz”, — dedi Ityalya.
Byuro rahbari bunday takliflar qayerdan kelgani to‘g‘risida izoh berishga haqli emas, lekin uning aytishicha, firibgarlar asosan uyushgan jinoyatchilik bilan bog‘liq va uchinchi davlatdan turib faoliyat yuritadi.
Bunday takliflarni olgan Yevropa Ittifoqining bir nechta davlatlari Yevrokomissiyaga murojaat qilganidan so‘ng OLAF firibgarliklar to‘g‘risida xabar topdi.
“Biz vaziyatni o‘rgandik va buning ortida jinoyatchilar turganini anqladik. Taklif juda ham yaxshi tuzilgan, ular butunlay haqiqiyga o‘xshaydi. Gap uyushgan jinoyatchilik haqida ketmoqda. Ya’ni taklif tushadi, lekin aslida vaksinalarning o‘zi mavjud emas”, — deb qo‘shimcha qildi Ityalya.
Avvalroq Yevropa davlatlari koronavirusga qarshi AstraZeneca preparati bilan emlash qayta boshlaganini e’lon qilgan edi. Yevropa Dori-darmon agentligi (EMA) mutaxassislarining vaksinaning xavfsizligi bo‘yicha o‘tkazgan tekshiruvi bayonotidan so‘ng shunday qarorga kelindi. Mutaxassislar preparat tufayli qon tomirlarida tromb hosil bo‘lishini tasdiqlovchi hech qanday dalil topmadi.
Daniyada AstraZeneca vaksinasi bilan emlangan ikki nafar tibbiyot xodimi kasalxonaga yotqizildi. Keyinroq ulardan biri vafot etdi. Ayni paytda Polshada esa AstraZeneca Britaniya—Shvetsiya kompaniyasining minglab dozadagi vaksinalari foydalanmasdan qolib ketmoqda: fuqarolar ushbu dori bilan emlanishdan bosh tortmoqda.
Izoh (0)