Rossiya prezidenti Vladimir Putin 2021-yil 23-mart kuni koronavirusga qarshi vaksina bilan emlanishini ma’lum qildi. Putin aynan qaysi turdagi preparat bilan vaksinatsiya qilinishga aniqlik kiritmagan. Uning so‘zlariga ko‘ra, mamlakatda vaksinatsiyaning borish sur’atini tezlashtirish lozim, bu pandemiya tufayli joriy qilingan cheklovlarning yumshatilishi va bosqichma-bosqich bekor qilinishiga sabab bo‘ladi, deb yozmoqda “Kommersant”.
“Vaksinatsiya — bu har bir fuqaroning ixtiyoriy xohishi va shaxsiy fikriga bog‘liq jarayon. Umuman olganda, o‘zim ham ertaga koronavirusga qarshi emlanmoqchiman”,— degan Putin vaksinalar ishlab chiqarish va aholini emlash ishlariga bag‘ishlab o‘tkazilgan yig‘ilishda.
Putin qaysi vaksina bilan emlanishi borasida aniq fikr aytmagan. Biroq Rossiyada ishlab chiqarilgan vaksinalarning odamlar salomatligi uchun xavfsiz ekanligiga urg‘u bergan.
“Xorijning hech bir preparati virusdan himoyalash borasida bu kabi yuqori darajadagi samaradorlik namoyish qilmagan”,— deydi Putin.
Rossiya prezidentining matbuot kotibi Dmitriy Peskov Putinning mahalliy vaksinalardan biri bilan emlanishini xabar qilgan.
Putin vaksinatsiya ishlarini jadallashtirish, emlash preparatlari hamma uchun qulay va ochiq bo‘lishi kerakligini ta’kidlagan. Uning aytishicha, koronavirus cheklovlarini bekor qilish masalalari mazkur harakatlarga bevosita bog‘liq.
“Rossiyada vaksinatsiyaning dastlabki bosqichida 6,3 million odam emlangan, shundan 4,3 million fuqaro to‘liq vaksinatsiya qilingan, ya’ni preparatning birinchi va ikkinchi dozalarini qabul qilib olgan”,— degan Putin yig‘ilishda.
Yig‘ilishda Rossiyada aholining 4,4 foizi koronavirusga qarshi emlangani qayd etilgan. AQShda 73,6 million aholi COVID-19’ga qarshi vaksinatsiya qilingan va bu mamlakat umumiy aholisining 22 foizini tashkil qiladi.
Rossiyada koronavirusga qarshi 3 ta vaksina ro‘yxatdan o‘tkazilgan: “Gamaleya” markazining “Sputnik V”, Novosibirskning “Vektor” markazi tomonidan ishlab chiqilgan “EpiVakKorona” va Chumakov nomidagi markaz ishlab chiqqan “KoviVak”. Rossiyada aholini COVID-19’ga qarshi emlash ishlari 2020-yil dekabr oyida boshlangan. 2021-yil yanvar oyi o‘rtalarida ommaviy vaksinatsiyaga start berilgan.
Avval mart boshida davlat rahbarlaridan Ukraina prezidenti Vladimir Zelenskiy koronavirusga qarshi emlangani, Hindiston bosh vaziri Narendra Modi koronavirusga qarshi mamlakatda ishlab chiqarilgan COVAXIN vaksinasining birinchi dozasini olgani, shuningdek, Dunyoning eng badavlat kishilaridan biri, Berkshire Hathaway bosh direktori Uorren Baffet Pfizer/BioNTech kompaniyasining vaksinasi bilan koronavirusga qarshi emlangani haqida xabarlar berilgan.
Fevral oyida Turkiya prezidenti Rajab Toyyib Erdo‘g‘on unga koronavirusga qarshi vaksinaning ikkinchi dozasi yuborilganini ma’lum qilgan, u vaksinaning birinchi dozasini 14-yanvarda qabul qilib olgandi.
Bundan avval Shahzoda Charlz va uning rafiqasi, BMT bosh kotibi, milliarder Bill Geyts hamda Argentina prezidenti koronavirus vaksinasi bilan emlangan.
Izoh (0)