AstraZeneca shved-ingliz kompaniyasining koronavirusga qarshi vaksinasi AQSh, Peru va Chilida o‘tkazilgan klinik sinovlarda COVID-19’ning og‘ir shaklidan himoya qilish bo‘yicha 100 foiz, kasallik simptomlariga qarshi 79 foiz samaradorlik ko‘rsatdi. Bu haqda AstraZeneca va Oksford universiteti vakillari ma’lum qildi, deb yozadi “Interfaks”.
Xabarga ko‘ra, klinik sinovlarda 32 400 kishi ishtirok etgan.
Kompaniyaning qo‘shimcha qilishicha, mustaqil ekspertlar guruhi “emlash bilan bog‘liq xavotirlar uchun hech qanday sabab topmagan”, shu jumladan, “tromboz yoki trombotik hodisalar xavfining ortishi holatlari kuzatilmagan”.
Eslatib o‘tamiz, AstraZeneca vaksinasi bilan emlanganlarning qonida tromb paydo bo‘lgani haqidagi xabarlardan so‘ng bir qator mamlakatlar preparatdan foydalanishni to‘xtatib qo‘ygandi. Holat bo‘yicha tekshiruv o‘tkazgan Yevropa dori-darmon agentligi (EMA) AstraZeneca vaksinasini xavfsiz deb topdi. Regulyatorning fikricha, vaksinaning afzalliklari uning nojo‘ya ta’siridan ko‘proq, preparat qonda tromb paydo bo‘lish xavfini oshirmaydi.
Shundan so‘ng Yevropa mamlakatlari AstraZeneca bilan emlashni qayta boshladi.
JSST AstraZeneca vaksinasidan foydalanishni to‘xtatishga sabab ko‘rmayotganini ma’lum qildi. JSST, shuningdek, tromboembolizm dunyodagi eng keng tarqalgan yurak-qon tomir kasalliklari orasida uchinchi o‘rinda turishini va prinsipial jihatdan juda keng tarqalgan hodisa ekanini ta’kidladi.
Norvegiyalik professor Pol Andrening fikricha, qon tromblari, ehtimol, AstraZeneca vaksinasini qabul qilgandan keyin kuchli immun reaksiyasi paydo bo‘lishi bilan bog‘liq: bemorning tanasida trombotsitlarni faollashtiradigan va qon tromblarining paydo bo‘lishiga olib keladigan o‘ziga xos antitanalar ishlab chiqarilgan.
AstraZeneca ma’lumotlariga ko‘ra, Yevropa Ittifoqi va Buyuk Britaniyada 17 million kishi COVID-19’ga qarshi mazkur vaksinani qabul qilgan.
Avvalroq Yevropaning yarmi rad etgan AstraZeneca vaksinasini Tojikiston mamnuniyat bilan qabul qilmoqchiligi, Qirg‘iziston esa AstraZeneca vaksinasini olish masalasini ko‘rib chiqishni to‘xtatgani haqida xabar berilgandi.
17-mart kuni Toshkentga AstraZeneca vaksinasining 660 ming dozasi olib kelindi.
Izoh (0)