Yevropa davlatlari koronavirusga qarshi AstraZeneca preparati bilan emlash qayta boshlaganini e’lon qildi. Yevropa Dori-darmon agentligi (EMA) mutaxassislarining vaksinaning xavfsizligi bo‘yicha o‘tkazgan tekshiruvi bayonotidan so‘ng shunday qarorga kelindi. Mutaxassislar preparat tufayli qon tomirlarida tromb hosil bo‘lishini tasdiqlovchi hech qanday dalil topmadi, deb yozmoqda “RBK”.

Foto: Reuters

Germaniya sog‘liqni saqlash federal vaziri Yens Span mamlakatda 19-mart kuni AstraZeneca bilan emlash qayta boshlanishini ma’lum qildi. Vazir dushanbadan beri preparatni qo‘llash to‘xtatilgani sababli “endi yo‘qotilgan to‘rt kunning o‘rnini qoplash zarur”ligini aytdi. U shifokor va bemorlarning yuzaga kelishi mumkin bo‘lgan xatarlardan boxabar bo‘lishini ta’kidladi. “Fuqarolar ehtimoliy xavfdan shaffof ravishda xabardor qilinishiga ishonch bildirishi mumkin”, — dedi Span.

Fransiyada AstraZeneca bilan emlash 19-mart kuni tushdan keyin qayta boshlanadi. Fransiya bosh vaziri Jan Kasteksning aytishicha, “vaksinaga nisbatan to‘liq ishonchni ko‘rsatish uchun” uning o‘zi juma kuni ushbu preparat bilan emlanadi.

Italiya, Ispaniya, Bolgariya, Portugaliya va Sloveniya ham AstraZeneca bilan emlashni qayta boshlaydi, deya xabar berdi Bloomberg.

Mazkur preparat bilan emlashni to‘xtatgan Shvetsiya esa o‘z tekshiruvlarini davom ettirmoqda.

EMA’ning fikriga ko‘ra, emlash qon tromblari bo‘yicha umumiy xavfni oshirmaydi va emlashning koronavirusga qarshi foydasi nojo‘ya ta’sirlardan ustunroq. “Juda kam hollarda emlash qon tromblari bilan bog‘liq bo‘lishi mumkin”, — deb ta’kidladi regulyator.

Regulyator ma’lumotlariga ko‘ra, 16-martga qadar Yevropada, shu jumladan, Buyuk Britaniyada, 20 millionga yaqin odam AstraZeneca vaksinasini qabul qilgan. Nojo‘ya ta’sirlarni baholash qo‘mitasi umumiy hisobda emlanganlarning 469 nafarida qon tromblarini aniqladi. Vaksina qabul qilganlar sonini hisobga olgan holda, tromboz bilan og‘rigan bemorlarning ulushi aholi orasida kuzatiladigan mazkur kasallikka uchrash bo‘yicha odatiy holatining o‘rtacha ko‘rsatkichidan past.

Eslatib o‘tamiz, AstraZeneca vaksinasi bilan emlanganlarning qonida tromb paydo bo‘lgani haqidagi xabarlardan so‘ng bir qator mamlakatlar preparatdan foydalanishni to‘xtatib qo‘ygandi. Xususan, Germaniya, Fransiya, ItaliyaIspaniya, Sloveniya, Portugaliya, Kipr, Niderlandiya, Avstriya, Daniya, Estoniya, Latviya, Litva, Bolgariya, Irlandiya, Lyuksemburg, Norvegiya va Islandiya, shuningdek, Yevropadan tashqaridagi Indoneziya, Kongo va Janubiy Afrika mamlakatlarida mazkur vaksinadan foydalanish to‘xtatilgan edi.

JSST AstraZeneca vaksinasidan foydalanishni to‘xtatishga sabab ko‘rmayotganini ma’lum qildi. Keyinroq AstraZeneca emlashning nojo‘ya ta’siri to‘g‘risidagi xabarlarga javob berdi

Avvalroq Yevropaning yarmi rad etgan AstraZeneca vaksinasini Tojikiston mamnuniyat bilan qabul qilmoqchiligi haqida xabar berilgandi.

17-mart kuni esa Toshkentga AstraZeneca vaksinasining 660 ming dozasi olib kelindi.