Фирибгарлар Финляндия ва бошқа бир қатор Европа Иттифоқи мамлакатларида қиймати 14 миллиард евролик мавжуд бўлмаган COVID-вакциналарни сотиб олишни таклиф қилди. Бу ҳақда Европа Фирибгарликка қарши кураш бюроси (OLAF) директори Вилли Итяляга таяниб «Korrespondent.net» хабар берди.
«Биз вакцинанинг Финляндияда ҳам таклиф қилингани ҳақида биламиз», — деди Итяля.
Бюро раҳбари бундай таклифлар қаердан келгани тўғрисида изоҳ беришга ҳақли эмас, лекин унинг айтишича, фирибгарлар асосан уюшган жиноятчилик билан боғлиқ ва учинчи давлатдан туриб фаолият юритади.
Бундай таклифларни олган Европа Иттифоқининг бир нечта давлатлари Еврокомиссияга мурожаат қилганидан сўнг OLAF фирибгарликлар тўғрисида хабар топди.
«Биз вазиятни ўргандик ва бунинг ортида жиноятчилар турганини анқладик. Таклиф жуда ҳам яхши тузилган, улар бутунлай ҳақиқийга ўхшайди. Гап уюшган жиноятчилик ҳақида кетмоқда. Яъни таклиф тушади, лекин аслида вакциналарнинг ўзи мавжуд эмас», — деб қўшимча қилди Итяля.
Аввалроқ Европа давлатлари коронавирусга қарши AstraZeneca препарати билан эмлаш қайта бошлаганини эълон қилган эди. Европа Дори-дармон агентлиги (EMA) мутахассисларининг вакцинанинг хавфсизлиги бўйича ўтказган текшируви баёнотидан сўнг шундай қарорга келинди. Мутахассислар препарат туфайли қон томирларида тромб ҳосил бўлишини тасдиқловчи ҳеч қандай далил топмади.
Данияда AstraZeneca вакцинаси билан эмланган икки нафар тиббиёт ходими касалхонага ётқизилди. Кейинроқ улардан бири вафот этди. Айни пайтда Польшада эса AstraZeneca Британия—Швеция компаниясининг минглаб дозадаги вакциналари фойдаланмасдан қолиб кетмоқда: фуқаролар ушбу дори билан эмланишдан бош тортмоқда.
Изоҳ (0)