Buyuk Britaniya qirolichasi Yelizaveta II’ning rasmiy qarorgohi bo‘lgan Bukingem saroyi qirollik oilasi a’zolari turar joylarining barchasidagi xilma-xillik va inklyuziya siyosatini qayta ko‘rib chiqadi. Bu haqda Britaniya OAV manbalariga tayanib, Meduza xabar berdi.
“Bizda xilma-xillikni qo‘llab-quvvatlash uchun protseduralar va dasturlar mavjud, ammo hali ko‘zlangan yutuqqa erishganimiz yo‘q, shuning uchun yana ko‘p ishlar qilinishi kerakligi to‘g‘risida kelishib oldik”, — deyiladi saroyning Daily Mail nashriga bergan bayonotida.
Qayd etilishicha, xilma-xillikni qo‘llab-quvvatlash bo‘yicha mavjud amaliyotni baholash shahzoda Garri va uning rafiqasi Megan Markl Buyuk Britaniya qirollik oilasini irqchilikda ayblaganidan oldinroq boshlangan, ammo ularning intervyusidan so‘ng “yangi turtki” olgan.
Baholash doirasida Bukingem saroyi etnik ozchiliklar vakillari va nogironlar jamoasi bilan maslahatlashadi. Saroy, shuningdek, xilma-xillik uchun rahbar tayinlash imkoniyatini ko‘rib chiqmoqda.
“Ko‘plab tadbirlar ko‘rib chiqilmoqda. Albatta, kimdadir bu harakat yetakchiligini o‘z zimmasiga olish va xilma-xillikni qo‘llab-quvvatlash g‘oyasi bo‘lsa, e’tiborga olamiz. Ammo aniq rejalar haqida e’lon qilishga hali erta. Biz ushbu toifa vakillarini tinglaymiz va to‘g‘ri tushunishni o‘rganamiz”, — deyiladi saroyning CNN’ga bergan bayonotida.
Eslatib o‘tamiz, mart boshida Britaniya shahzodasi Garri va uning rafiqasi Megan Markl amerikalik mashhur teleboshlovchi Opra Uinfriga bergan intervyusi e’lon qilingandi. Markl intervyuda qirollik oilasining ayrim a’zolari uning birinchi farzandi tug‘ilmasdan avval bolaning terisi rangidan tashvishlangani va Megan ruhiy tushkunlikka tushgan paytda mutaxassislarga murojaat qilishiga yo‘l qo‘ymaganini aytgan (go‘yoki bu qirollik obro‘siga putur yetkazadi). 2020-yilda qirollik unvonlari va majburiyatlaridan omma oldida voz kechib, AQShga ko‘chib o‘tgan juftlik intervyu mobaynida bir qator e’tiborga molik bayonot va boshqa masalalar qatorida Britaniya monarxiyasining parda ortidagi hayotidan ba’zi sirlarni ochib berdi.
Shahzoda Garri va rafiqasi Marklning intervyusidan keyin shov-shuv ko‘tarilib, ayni kunlarda butun dunyoda muhokama qilinmoqda. Avval Britaniya qirollik oilasi Megan Marklning irqchilik masalasi haqidagi bayonotini o‘rganib chiqishga va’da bergandi. Yelizaveta II esa nabirasining intervyusiga baho berish uchun biroz vaqt kerakligini aytgan.
Izoh (0)