O‘zbekistonga Hindistondan 17-martga o‘tar kechasi 660 ming doza Covishield koronavirus vaksinasi (Britaniyaning AstraZeneca vaksinasining mahalliy nomi, Hindistonning Serum instituti tomonidan litsenziya asosida ishlab chiqarilgan) yetkazib beriladi. Bu haqda Sanitariya-epidemiologiya xizmati xabar berdi.
Qayd etilishicha, 1,98 million dollarlik vaksinalar Toshkent xalqaro aeroportiga soat 01:55 da yetib keladi. Ular YuNISEF tomonidan COVAX dasturi doirasida olib kelinmoqda. Vaksinalar O‘zbekistonga bepul yetkazib beriladi.
Avvalroq O‘zbekistonga COVAX dasturi doirasida 2,6 million doza AstraZeneca vaksinasi olib kelinishi, vaksinaning dastlabki partiyasi 20-martga qadar keltirilishi kutilayotgani haqida xabar berilgandi. Shundan 2021-yilning I choragida 35—40 foizi, qolgan qismi II chorakdan dunyo bo‘ylab vaksinalarni ishlab chiqarish imkoniyatlaridan kelib chiqqan holda, bosqichma-bosqich yetkazib berilishi ma’lum qilingan.
Shuningdek, 23-fevral kuni YuNISEF tomonidan Sanitariya-epidemiologik osoyishtalik va jamoat salomatligi xizmati uchun 17 ta muzlatkichli yuk mashinasi va 206 ta miniven Changan avtomobillari topshirilgan. Ushbu maxsus avtomobillarning bir nechtasi foydalanishga topshirilgan kuniyoq Toshkentda YTHga uchradi.
Bundan tashqari, O‘zbekistonga COVAX dasturi doirasida yuborilgan 4,5 tonna qadoqlangan shprislar qabul qilingan.
Eslatib o‘tamiz, qonda tromblar paydo bo‘lishi kuzatilgani sabab AstraZeneca vaksinasi bilan emlash Daniya, Norvegiya, Islandiya, Italiya, Germaniya, Fransiya, Ispaniya va Bolgariyada to‘xtatilgani, Tailandda esa keyinga qoldirilgani ma’lum qilindi. JSST AstraZeneca vaksinasidan foydalanishni to‘xtatishga sabab ko‘rmayotganini ma’lum qildi. Keyinroq AstraZeneca emlashning nojo‘ya ta’siri to‘g‘risidagi xabarlarga javob berdi. O‘zbekistonda esa ushbu vaksinadan foydalanish davom etishi ma’lum qilindi.
Izoh (0)