Toshkentda vaksina tashishga mo‘ljallangan maxsus avtomobillar foydalanishga topshirilgan kuniyoq YTHga uchradi

Toshkentning Mirobod tumanidagi Nukus va Amir Temur ko‘chalari kesishgan chorrahada vaksinalarni tashish uchun mo‘ljallangan bir nechta avtomobil ishtirokida yo‘l-transport hodisasi sodir bo‘ldi, deb xabar beradi IIV YHXBB axborot xizmati.

Ma’lum qilinishicha, avariya 23-fevral kuni soat 11:30 larda avtomobil haydovchilaridan birining keskin tormoz bosishi oqibatida yuzaga kelgan. Mashina keskin to‘xtashni amalga oshirgani sabab mashina ortida harakatlanayotgan yana 6 ta miniven Changan ham keskin tormozlanishini amalga oshirgan.

Sog‘liqni saqlash vazirligi matbuot xizmatining yozishicha, 23-fevral kuni YuNISEF tomonidan Sanitariya-epidemiologik osoyishtalik va jamoat salomatligi xizmati uchun 17 ta muzlatkichli yuk mashinasi va 206 ta miniven Changan avtomobillari topshirilgan. Mashinalarning umumiy qiymati 2 million dollarni tashkil etadi. Ushbu mablag‘ Vaksinalar va immunizatsiya bo‘yicha global alyansi (GAVI) tomonidan sog‘liqni saqlash tizimini mukammallashtirish doirasida ajratilgan.

“Hodisa natijasida 2 ta avtomobil texnik shikastlangan. Tan jarohati olgan fuqarolar yo‘q. Mazkur hodisa yuzasidan Toshkent shahar IIBB YHXB tomonidan surishtiruv ishlari olib borilib, hodisa sodir bo‘lish sabablariga oydinlik kiritilmoqda”, — deyiladi idora xabarida. Mavzuga doir:

• O‘zbekistonda tez tibbiy yordamning bir martalik tashrifi o‘rtacha 150 ming so‘mga tushishi ma’lum qilindi
• Asaka tumanida sodir bo‘lgan YTHda tez tibbiy yordam mashinasi haydovchisi vafot etdi