Rejissyor Jeyms Kemeron Empire nashriga bergan intervyusida “Avatar” olami asosida animatsion antologiya (turli qismlardan iborat serial) yaratish rejalari haqida so‘zlab berdi.
Ushbu g‘oya Disney studiyasi rahbariyatiga allaqachon taqdim etilgan. Kemeronning aytishicha, loyiha hozircha dastlabki ishlab chiqarish bosqichida va yaqin yillarda amalga oshirilishi ehtimoldan xoli emas.
“Hozircha serial bo‘yicha ko‘p ish qilganimiz yo‘q. Biz asosan syujet hikoyalari ustida ishlayapmiz. Avvalo, biz tajribali kinorejissyorlar va animatorlarni jalb etishimiz kerak, ular ushbu loyihaga katta qiziqish bildirishi lozim”, deydi Kemeron.
Rejissyorning ta’kidlashicha, serial format jihatidan “Animatritsa” (2003-yilgi “Matritsa” olami asosida yaratilgan antologiya) loyihasidan ilhomlangan. Unda odamlarning Pandoraga ilk marta tashrif buyurishi, film qahramonlarining o‘tmishdagi sarguzashtlari yoki asosiy qismlarda tasvirlanmagan epizodlar aks etishi mumkin.
“Men aynan animatsion antologiya suratga olishni ko‘zlaganman”, deydi Kemeron.
Ayni paytda “Avatar” olamining muxlislari franshizaning uchinchi qismini kutishmoqda. Bu film 2022-yilda chiqqan “Avatar: Suv yo‘li” filmidagi voqealarning mantiqiy davomi bo‘ladi. Uning premyerasi 2025-yil 19-dekabrga belgilangan. To‘rtinchi va beshinchi qismlar esa mos ravishda 2029- va 2031-yillarda katta ekranlarga chiqishi rejalashtirilgan.
Franshizaning birinchi va ikkinchi qismlari kinotarixdagi eng ko‘p daromad keltirgan filmlar ro‘yxatida yetakchi o‘rinlarni egallaydi. Birinchi qism dunyo bo‘yicha 2,9 milliard dollardan ortiq, ikkinchisi esa 2,3 milliard dollardan ko‘proq daromad olgan.
Avvalroq Jeyms Kemeron “Avatar 6” va “Avatar 7” uchun ham muayyan g‘oyalari borligini ochiqlagan, uchinchi, to‘rtinchi va beshinchi qismlar uchun ssenariylar allaqachon yozib bo‘lingani haqida ma’lum qilgan edi.
Izoh (0)