“Manchester Siti” darvozaboni Ederson faoliyatini Turkiyada davom ettirishi mumkin. Fichajes nashrining yozishicha, 31 yoshli braziliyalik posbon Istanbulning “Galatasaroy” klubi bilan shartnoma bo‘yicha kelishib olgan.
Manbaga ko‘ra, endilikda “Galatasaroy” rahbariyati “Manchester Siti” bilan transfer masalasida muzokaralarni boshlaydi. Bitim qiymati taxminan 10 million yevro atrofida bo‘lishi kutilmoqda.
Transfer amalga oshsa, Ederson Turkiya chempionatida asosiy darvozabon maqomini qo‘lga kiritadi. Istanbul klubi kelasi mavsum Yevrokuboklarda ham ishtirok etishini hisobga olganda, bu futbolchi uchun yangi chaqiriq bo‘lishi mumkin.
“Manchester Siti” yozgi transfer oynasida 22 yoshli darvozabon Jeyms Traffordni “Byornli”dan 31 million yevroga xarid qilgan. Bu esa Edersonning asosiy tarkibdagi o‘rnini yo‘qotishiga olib keldi. Shu bois Ederson boshqa jamoaga o‘tishni istamoqda.
Ma’lumot uchun, Ederson 2017-yilda “Benfika”dan “Siti”ga 40 million yevro evaziga transfer qilingan edi. U o‘tgan mavsumda 40 ta o‘yinda maydonga tushib, 53 ta gol o‘tkazib yuborgan va 13 o‘yinda darvozasini daxlsizligini saqlab qolgan. Transfermarkt portali uning qiymatini 20 million yevroga baholamoqda.
Izoh (0)