Energetika vazirining birinchi o‘rinbosari Sherzod Xo‘jayev 15-mart, dushanba kuni OAV vakillariga bergan intervyusida Qirg‘iziston prezidenti Sadir Japarovning 11—12-mart kunlari O‘zbekistonga qilgan tashrifi davomida ikki mamlakat o‘rtasida imzolangan elektr energiyasini yetkazib berish to‘g‘risidagi memorandumga oid savollarga javob qaytardi, deya xabar bermoqda “Daryo” muxbiri Mirolim Isajonov.
Xo‘jayevning aytishicha, O‘zbekiston va Qirg‘izistonning energetika idoralari rasmiylari sohaga oid qator masalalar bo‘yicha bir oy mobaynida ish olib borgan.
“Bundan 40—50 yil oldin energiya tizimi ayni rivojlanayotgan paytda nima qilingan edi: O‘zbekistonda issiqlik elektr stansiyalari bir xil me’yorda ishlardi, Qirg‘iziston va Tojikistonda gidroelektr stansiyalari bizga suv kerak bo‘lgan vaqtda ishlab, qo‘shimcha yana elektr energiyasi ishlab chiqarardi. Shunday rejimda ishlaganmiz. Keyin ming afsuski, mamlakatlar o‘rtasidagi munosabatlar buzilgan.
Qirg‘iziston o‘z ehtiyojini qoplash uchun gidroelektr stansiyalari suvini qishda ko‘proq ishlab chiqara boshladi. Yozgacha suv kamayib qolaverdi. Bizning yozda suvga ehtiyojimiz bor, lekin ularning suv omborida suv yo‘q. Ammo qo‘shni mamlakatning qishda elektr energiyasiga ehtiyoji bor.
Biz tashrif davomida shunga kelishdikki, har yili uchun belgilangan ma’lum bir miqdordagi elektr energiyasining ortiqcha qismini ularga beramiz, ular buning evaziga yoz paytida uch oy elektr energiyasini qaytarib beradi. Elektr energiyani qaytarib berdi degani, xohlaydimi, xohlamaydimi gidroelektr stansiyalari suv omboridan Norin daryosi va Sirdaryo uchun qo‘shimcha suv chiqadi, degani. Bu Farg‘ona vodiysi, Sirdaryo va Jizzax viloyatlari qishloq xo‘jaligiga juda katta ta’sir ko‘rsatadi. Bu eng oson va eng tez yechimi topilgan yo‘nalish”, — dedi vazir o‘rinbosari.
Uning ta’kidlashicha, tomonlar 24 soat davomida elektr energiyasini o‘zaro yetkazib berish bo‘yicha ham kelishuvga erishgan.
“Elektr energiyasi iste’moli qish oylarida soat 17:00 dan 21:00 gacha birdaniga ortib ketadi. Hamma uyiga kelib, chirog‘ini yoqadi, ovqat pishirishni boshlaydi, choy qo‘yadi va hokazo. Shu to‘rt soat uchun biz qaysidir issiqlik elektr stansiyamizning qo‘shimcha elektr energiya blogiga gaz yoqib, ishga tushirib, to‘rt soatdan so‘ng yana o‘chiramiz. Bu aslida juda katta samarasiz mehnat.
Buning osonroq yo‘li bor. Ya’ni biz qo‘shnilarimizga ushbu to‘rt soat mobaynida elektr energiyasi ishlab chiqarishni o‘zlarining gidroelektr stansiyalarida ishlab chiqarishni so‘raymiz va tunda biz ushbu hajmni qaytarib beramiz. Shu tariqa sutka davomida elektr energiyasi almashinuvini amalga oshirishga kelishdik. Masalan, biz tunda Qirg‘izistonga maksimal darajada elektr energiyasi berib, kunduzi qaytarib olamiz. Bir-birimizga yelkadosh bo‘lamiz.
Bizning texnik imkoniyatimiz sutka mobaynida 10 million kVt/soatgacha elektr energiyasi olish va yetkazib berishga ega. Aslida, bu juda katta ko‘rsatkich”, — dedi Xo‘jayev.
Izoh (0)