O‘zbekiston COVAX dasturi doirasida 2,6 mln doza AstraZeneca vaksinasini oladi
O‘zbekiston COVAX dasturi doirasida 2,6 million doza AstraZeneca vaksinasini oladi. Bu haqda “Koronavirus info” kanali YuNISEF xabariga tayanib xabar qildi.
COVAX dasturi bo‘yicha koronavirusga qarshi vaksinalar kam va o‘rtacha daromadli 92 mamlakatga iyun oyigacha taqdim etiladi. YuNISEF taqdim etgan jadvalga ko‘ra, O‘zbekiston 2 million 640 ming doza AstraZeneca/Oxford vaksinasini oladi.
Ma’lum qilinishicha, vaksinaning bir dozasi narxi, taxminan, 3 dollarni tashkil etadi.
Avvalroq Sanitariya-epidemiologik osoyishtalik va jamoat salomatligi xizmati boshlig‘i Bahodir Yusupaliyev O‘zbekistonga JSST qo‘llashga ruxsat bergan Pfizer va BioNTech kompaniyalari ishlab chiqargan koronavirusga qarshi vaksina keltirilishini aytgandi.Uning o‘rinbosari Botirjon Qurbonov 50 ming kishini ikki martadan emlash uchun yetarli miqdorda buyurtma qilingan Pfizer-BioNTech vaksinasi bilan O‘zbekistonda birinchi galda shifokorlar va keksalar emlanishini bildirgan. Hozirda Toshkentdagi Virusologiya ilmiy-tekshirish instituti klinikasida Pfizer-BioNTech vaksinasini 70 daraja sovuqda saqlash imkonini beradigan muzlatkichlar hozirlab qo‘yilgani ma’lum qilingan.
Moliya vaziri Timur Ishmetov 2021-yilda O‘zbekiston koronavirusga qarshi kurashish tadbirlari va vaksina sotib olish xarajatlari uchun 3 trillion so‘m ajratishini bildirgan.
