Indoneziyaning eng faol vulqonlaridan biri — Levotobi Laki Laki ketma-ket ikkinchi kun otilmoqda. U 18 kilometr balandlikka tutun va kul otib, osmonda ulkan bulutlar hosil qildi. Bu haqda CNN xabar berdi.
Geologiya agentligining ma’lum qilishicha, vulqon otilishi 1-avgust kuni boshlangan. Atrofdagi qishloqlar vulqon parchalari va tutun bilan qoplagan. Dastlabki ma’lumotlarga ko‘ra, hodisa oqibatida halok bo‘lganlar yo‘q.
Vulqon otilishidan bir necha soat oldin, 10 kilometr balandlikda kul buluti hosil bo‘lgan. Yonayotgan lava va chaqmoqlar esa tungi osmonni yoritib yuborgan. Qayd etilishicha, gaz, tosh va lavadan iborat massa vulqon etagidan 5 kilometr pastga qarab oqib tushmoqda. Dronlar yordamida olingan kuzatuvlarda magma harakati kuchaygani va bu hududda kuchli yer silkinishlariga sabab bo‘layotgani qayd etilgan.
Kraterdan otilayotgan issiq toshchalardan iborat vulqon materiali 8 kilometrgacha uzoqlikka sochilgan. Rasmiylar yomg‘irli ob-havo sabab lavaning daryoga tomon yo‘nalishidan xavotir bildirib, fuqarolarni hushyor bo‘lishga chaqirmoqda.
Ma’lumot uchun, 1 584 metr balandlikdagi Levotobi Laki Laki vulqoni Flores orolida joylashgan bo‘lib, u 18-iyundan beri faol holatda. Yer silkinishlari sabab atrofdagi aholiga 7 kilometr radiusgacha hududga yaqinlashish man etilgan.
2024-yil noyabr oyida ro‘y bergan bir nechta vulqon otilib, portlashi oqibatida 9 kishi halok bo‘lgandi. Minglab uylar vayron bo‘lgach, hukumat atrofdagi aholining boshqa hududga doimiy ko‘chirilishini ta’minlagan.
Ta’kidlanishicha, so‘nggi marta mamlakatda eng kuchli vulqon otilishlaridan biri 2010-yilda sodir bo‘lgandi. O‘shanda Yava orolidagi Merapi vulqoni otilib, 350 dan ortiq odam halok bo‘lgan va yuz minglab aholi evakuatsiya qilingan.
Shuningdek, Indoneziyada 2025-yil 7-iyulda ham vulqon faolligi kuzatilgan. Vulqon kulining ko‘pligi Bali orolidagi Ngurah Ray xalqaro aeroportidagi o‘nlab reyslarning kechikishiga yoki bekor qilinishiga sabab bo‘lgan, yo‘llar va sholikorlik maydonlari esa kul va toshlar bilan qoplangan.
Izoh (0)