AstraZeneca vaksinasi bilan emlash Tailandda keyinga qoldirildi, Bolgariyada esa to‘xtatildi

Tailand bosh vaziri Prayut Chan-Och va bir nechta hukumat a’zolari mamlakatda aholini AstraZeneca bilan emlash ishlarini keyinga qoldirdi. Ular Norvegiya va Daniya kabi bir qator mamlakatlarda qon tromblari kelib chiqish xavfi tufayli mazkur vaksinadan foydalanish to‘xtatilganidan so‘ng shunday qarorga keldi, deb yozgan “RBK”.

12-mart kuni Tailandda AstraZeneca yordamida koronavirusga qarshi emlash ishlari boshlanishi kerak edi. Mamlakat rasmiylari tomonidan buyurtma qilingan 63 million doza vaksinaning 61 million dozasini mazkur vaksina tashkil qiladi.

“Emlashni keyinga qoldirish bilan biz AstraZeneca vaksinasi yomon yoki sifatsiz demoqchi emasmiz. Xavfsizlik to‘g‘risidagi hisobotlarni ko‘rib chiqish va qonda tromblarning paydo bo‘lishi xavfini o‘rganish maqsadida vaksinatsiyani keyinga qoldirdik” ,—  degan Chulalongkorn universiteti virusologi, Tailand sog‘liqni saqlash vazirligining emlash komissiyasi a’zosi Yong Puvoravan.

Tailand sog‘liqni saqlash vazirligining emlash dasturi bo‘yicha maslahatchisi Piyasakol Sakolsatayadornning so‘zlariga ko‘ra, mamlakatda ommaviy emlashlar ko‘pi bilan ikki haftaga qoldirilgan. Aholining xavf ostidagi guruhlarini Xitoyning Sinovac preparati bilan emlash ishlari esa davom etadi.

Shuningdek, Tailanddan tashqari boshqa bir mamlakat – Bolgariyada ham bosh vazir Boyko Borisov  COVID-19’ga qarshi AstraZeneca vaksinasi bilan aholini emlash ishlarini to‘xtatish haqida buyruq bergan.

Bolgariya hukumatining rasmiy veb-saytidagi bayonotda aytilishicha, bosh vazir AstraZeneca vaksinasidan foydalanishni Yevropa dori-darmon agentligi (EMA) ushbu preparatning xavfsizligi haqidagi barcha shubhalarni rad etguniga qadar to‘xtatib turishga qaror qilgan.

“AstraZeneca vaksinasini qabul qilish mumkinligi yoki aksincha mumkin emasligidan qat’i nazar, Yevropa tibbiyot agentligidan yozma ravishda aniq tasdiqlangan tashxis olinmaguncha aholini vaksinatsiya qilish to‘xtatiladi”, — degan Borisov.

Borisov boshchiligidagi yig‘ilishda ishtirok etgan Bolgariya sog‘liqni saqlash vaziri Kostadin Angelov Angliya–Shvetsiya kompaniyasining vaksinadan foydalanishni vaqtincha to‘xtatib turish to‘g‘risida buyruq chiqarishga tayyorligini bildirgan.

“Emlash kampaniyasi Pfizer va Moderna vaksinalari yordamida davom ettiriladi”, — deya qayd etgan Angelov.

Bolgariya sog‘liqni saqlash vazirligining ma’lumotlariga ko‘ra, so‘nggi 24 soat ichida mamlakatda COVID-19 uchun 17 mingdan ortiq test o‘tkazilgan va kasallikni yuqtirish bo‘yicha 3121 ta holat qayd etilgan. Kun davomida 95 kishi kasallikdan vafot etib, jami infeksiya qurbonlari soni 11 mingdan oshgan.

Avvalroq Janubiy Koreya AstraZeneca vaksinasi bilan mamlakatdagi keksa fuqarolarni emlamaslikka qaror qilgan edi. Shuningdek, Ispaniya ham AstraZeneca vaksinasini keksalar uchun qo‘llashdan bosh tortgan.

Eslatib o‘tamiz, nemis mutaxassislari AstraZeneca vaksinasini 65 yoshdan oshganlarga tavsiya etmagan. Mutaxassislarning ta’kidlashicha, 65 yoshdan oshganlar uchun preparatning samarali ekaniga oid dalillar yetarli emas. Kompaniya esa ushbu ma’lumotlarni “mutlaqo noto‘g‘ri” deb atagan hamda Buyuk Britaniyaning vaksinatsiya va immunizatsiya bo‘yicha birlashgan qo‘mitasi tomonidan AstraZeneca’ni keksalarda qo‘llash ma’qullangani va emlanganlarda immunitet miqdori ortayotganini ta’kidlagan.