Ўзбекистонга Ҳиндистондан 17 мартга ўтар кечаси 660 минг доза Covishield коронавирус вакцинаси (Британиянинг AstraZeneca вакцинасининг маҳаллий номи, Ҳиндистоннинг Серум институти томонидан лицензия асосида ишлаб чиқарилган) етказиб берилади. Бу ҳақда Санитария-эпидемиология хизмати хабар берди.
Қайд этилишича, 1,98 миллион долларлик вакциналар Тошкент халқаро аэропортига соат 01:55 да етиб келади. Улар ЮНИСЕФ томонидан COVAX дастури доирасида олиб келинмоқда. Вакциналар Ўзбекистонга бепул етказиб берилади.
Аввалроқ Ўзбекистонга COVAX дастури доирасида 2,6 миллион доза AstraZeneca вакцинаси олиб келиниши, вакцинанинг дастлабки партияси 20 мартга қадар келтирилиши кутилаётгани ҳақида хабар берилганди. Шундан 2021 йилнинг I чорагида 35—40 фоизи, қолган қисми II чоракдан дунё бўйлаб вакциналарни ишлаб чиқариш имкониятларидан келиб чиққан ҳолда, босқичма-босқич етказиб берилиши маълум қилинган.
Шунингдек, 23 февраль куни ЮНИСЕФ томонидан Санитария-эпидемиологик осойишталик ва жамоат саломатлиги хизмати учун 17 та музлаткичли юк машинаси ва 206 та минивэн Changan автомобиллари топширилган. Ушбу махсус автомобилларнинг бир нечтаси фойдаланишга топширилган куниёқ Тошкентда ЙТҲга учради.
Бундан ташқари, Ўзбекистонга COVAX дастури доирасида юборилган 4,5 тонна қадоқланган шприцлар қабул қилинган.
Эслатиб ўтамиз, қонда тромблар пайдо бўлиши кузатилгани сабаб AstraZeneca вакцинаси билан эмлаш Дания, Норвегия, Исландия, Италия, Германия, Франция, Испания ва Болгарияда тўхтатилгани, Таиландда эса кейинга қолдирилгани маълум қилинди. ЖССТ AstraZeneca вакцинасидан фойдаланишни тўхтатишга сабаб кўрмаётганини маълум қилди. Кейинроқ AstraZeneca эмлашнинг ножўя таъсири тўғрисидаги хабарларга жавоб берди. Ўзбекистонда эса ушбу вакцинадан фойдаланиш давом этиши маълум қилинди.
Изоҳ (0)