Myanmada internetga ulanishda uzilishlar qayd etildi. Bu haqda NetBlocks xalqaro notijorat tashkiloti ma’lumotlariga tayanib, “Izvestiya” xabar berdi.
“Myanmada shanba kuni mahalliy vaqt bilan 10:00 holatiga ko‘ra, ikkinchi umumiy internet uzilishi kuzatilyapti", — deyiladi NetBlocks’ning Twitter sahifasida.
Ta’kidlanishicha, mahalliy miqyosda internetga kirish imkoni 54 foizgacha tushib ketdi, foydalanuvchilar nosozliklar haqida xabar bermoqda. Avvalroq mamlakatning internet provayderlari “keyingi xabar berilguncha” hukumat buyrug‘i bilan Twitter va Instagram ijtimoiy tarmoqlariga kirishni bloklab qo‘ygan edi.
Reuters axborot agentligining xabar berishicha, hukumat talabi bilan Facebook’ning turli xil xizmatlaridan foydalanish imkoniyati cheklangan.
Myanma harbiylari internet provayderlariga Facebook’ni 4-fevraldan 7-fevralgacha bloklab qo‘yishni buyurgan, chunki foydalanuvchilar Twitter va Instagram kabi ijtimoiy tarmoqlar orqali mamlakat ichida bo‘layotgan voqealarga noroziligini bildirgan edi.
Umumiy ravishda internetda nosozlik kuzatilishi 31-yanvar kuni mamlakatdagi harbiy to‘ntarish va bir necha rasmiylarning hibsga olinishi fonida kuzatila boshladi.
1-fevral kuni davlat rahbari Vin Min va Aun San Su Chji qamoqqa olindi. Bu voqea hukumat va harbiylar o‘rtasida kuchaygan bir necha kunlik ziddiyat natijasida sodir bo‘ldi. Harbiylarning ta’kidlashicha, 8-noyabr kuni mamlakatda o‘tkazilgan saylovlarda qonunbuzarlik bo‘lgan.
Hukumat rahbari qo‘lga olingach mamlakatda bir yil muddatga favqulodda holat e’lon qilingan. Prezident vazifasini vaqtincha bajaruvchi etib vitse-prezident Mint Shve tayinlandi.
Avvalroq Myanmada harbiylar hokimiyatni egallab olgan va bir yil muddatga favqulodda holat joriy qilingani, Myanmada davlat to‘ntarishidan keyin vaqtinchalik prezident tayinlangani va Myanma harbiylari yangi saylovlar o‘tkazish rejasini e’lon qilgani haqida xabarlar berilgan edi.
Izoh (0)