AQSh prezidenti Jo Bayden Myanma harbiylarini zudlik bilan hokimiyatdan voz kechishga chaqirdi. U, shuningdek, Myanma demokratiyaga o‘tganidan keyin bekor qilingan sanksiyalarni qaytadan kiritish masalasini o‘rganishni buyurdi, deb yozadi “Kommersant”.
“Myanmalik harbiylarni zudlik bilan o‘zlari egallab olgan hokimiyatdan voz kechishga majbur qilish uchun xalqaro hamjamiyat birlashishi kerak”, — dedi Bayden. “AQSh demokratiya yo‘lidagi progressga asoslangan holda, so‘nggi o‘n yillik mobaynida Birmadan sanksiyalarni olib tashlagan edi”, — dedi AQSh prezident Myanmaning avvalgi nomini qo‘llab.
“Bu progressning orqaga qaytarilishi sanksiya siyosatimizning tezkorlik bilan qayta ko‘rib chiqilishini va tegishli choralar ko‘rilishini talab qiladi”, — dedi Jo Bayden. Uning so‘zlariga ko‘ra, AQSh “demokratiya qayerda hujumlarga uchrasa, o‘sha joyda uni qattiq turib talab qiladi.
Eslatib o‘tamiz, Myanma Qurolli kuchlari mamlakatda favqulodda holat e’lon qilib, hokimiyatni Qurolli kuchlar qo‘mondoni Min Aun Xlainuga topshirdi. Bundan oldin esa hukmron “Demokratiya uchun milliy liga” partiyasi vakili hukumat rahbari Aun San Su Chji qo‘lga olinganini ma’lum qildi.
Shundan keyin Myanmada aloqa bo‘yicha uzilishlar yuz berdi, hukumat televideniyesi va radio o‘z efirlarini to‘xtatdi. Harbiylar yangi parlament saylovlari o‘tkazilishini e’lon qildi.
Mavzuga doir:
- Myanmada harbiylar hokimiyatni egallab oldi va bir yilga favqulodda holat e’lon qildi
- Myanma harbiylari yangi saylovlar o‘tkazish rejasini e’lon qildi
- BMT bosh kotibi Myanma rahbariyatining qo‘lga olinishini qoraladi
- AQSh va Avstraliya hukumatlari Myanma harbiylarini qo‘lga olingan mansabdorlarni ozod etishga chaqirdi