BMT bosh kotibi Antoniu Guterrish hokimiyatni harbiy yo‘l bilan egallash fonida Myanma davlat rahbari Vin Myinning, “Demoktratiya uchun milliy liga” partiyasi yetakchisi Aun San Su Chjining va boshqa amaldorlarning hibsga olinishini qoraladi. Bu haqda Reuters ma’lumotlariga tayanib “Kommersant” xabar berdi.
“Bosh kotib Myanma yangi parlamentining sessiyasi ochilish arafasida bir nechta siyosiy yetakchilar hibsga olinishini qat’iy qoralamoqda”, — deydi bosh kotib vakili Stefan Dyujarrik o‘z bayonotida. Shuningdek, bosh kotib mamlakat harbiy kuchlarini xalq irodasini inobatga olishga, demokratiya me’yorlarini buzmaslikka va har qanday muammoni tinch yo‘l bilan hal qilishga da’vat qildi.
Bundan tashqari, Hindiston, Singapur va Avstraliya Tashqi ishlar vazirliklari ham mamlakatdagi holatdan xavotirda ekanini bildirdi. AQSh hukumati esa hibsga olingan amaldorlarni ozod qilishga chaqirdi.
Shuningdek, Myanma Bankirlar assotsiatsiyasi mamlakatdagi barcha banklar vaqtinchalik ish faoliyatini to‘xtatishini e’lon qildi. Qaror olib borilayotgan harbiy harakatlar fonida qabul qilindi.
Ma’lumot uchun, 1-fevral kuni Myanma harbiy kuchlari mamlakatda favqulodda holat e’lon qildi va hokimiyat boshqaruvi Qurolli Kuchlar bosh qo‘mondoni Min Aung Xlayn qo‘liga o‘tdi. Davlat rahbari, hukmron partiya yetakchilari, shuningdek, bir nechta partiya a’zolari va hukumat rasmiylari qamoqqa olindi. Aloqa sohasida uzilishlar mavjud, televideniye va radio efirlari vaqtincha uzib qo‘yildi va banklar faoliyati to‘xtatildi.
Avvalroq Myanmada harbiylar hokimiyatni egallab olgani va bir yilga favqulodda holat e’lon qilingani haqida xabar berilgan edi.
Izoh (0)