Myanmada hokimiyat harbiylar qo‘liga o‘tganidan so‘ng norozilik namoyishlari bo‘lib o‘tmoqda

Myanma aholisi 6-fevral kuni Yangon ko‘chalariga chiqib, harbiylar tomonidan hokimiyat egallab olinishiga qarshi chiqdi. Bu haqda “TASS” xabar qilmoqda.

Frontier Myanmar nashri xabar berishicha, Insein-roud ko‘chasidagi miting tinch tarzda o‘tmoqda, politsiyachilar namoyishchilarni tarqatib yubormayapti.

Odamlar harbiylarga qarshi ekanini bildirmoqda, hibsga olingan yuqori martabali amaldorlarni, jumladan, davlat maslahatchisi Aun San Su Chji va prezident Vin Myinni ozod etishni talab qilmoqda.

Turli hisob-kitoblarga ko‘ra, norozilik namoyishlarida bir necha yuzdan bir necha minggacha odamlar qatnashmoqda. Internet bilan bog‘liq muammolarga qaramay, ba’zi nashrlar shahar bo‘ylab yurgan ko‘plab namoyishchilar tasvirlangan qisqa videolarni tarmoqqa joylashtirishga muvaffaq bo‘lgan.

Shu bilan birga, har kuni mahalliy vaqt bilan soat 20:00 dan boshlab Myanmaning ko‘plab shaharlarida aholi norozilik namoyishlarini uyushtirmoqda. Ular qozon, turli idish va boshqa oshxona anjomlarini urib, o‘z noroziligini bildirmoqda. Ijtimoiy tarmoqlarda e’lon qilingan videolarga ko‘ra, kundan kunga norozilik ishtirokchilarining soni ko‘paymoqda.

Eslatib o‘tamiz, 1-fevral kuni Myanma harbiylari mamlakatda hokimiyatni qo‘lga kiritganini e’lon qildi, hukmron partiya rahbarlari va mamlakat prezidenti hibsga olindi. Qurolli kuchlar bosh qo‘mondoni Min Aung Xlayn mamlakatning muvaqqat prezidenti etib tayinlandi va mamlakatda bir yil muddatga favqulodda holat joriy etildi.

Davlat to‘ntarishiga sabab qilib o‘tgan yilgi saylovlardagi soxtaliklar va saylov komissiyasining harakatsizligi ko‘rsatildi. 2020-yil noyabrda bo‘lib o‘tgan saylovlarda “Demokratiya uchun milliy liga” partiyasi hukumat tuzish uchun yetarlicha ovoz to‘plagan, harbiylar tomonidan qo‘llab-quvvatlangan partiya esa mag‘lub bo‘lgan.

BMT bosh kotibi Antoniu Guterrish qurolli kuchlarning harakatlarini “Myanmada amalga oshirilgan demokratik islohotlarga jiddiy zarar yetkazish” deya qoraladi. Shuningdek, AQSh davlat kotibi Entoni Blinken Myanma davlat rahbarlarining hibsga olinishidan xavotir bildirdi va harbiylarni hibsga olingan siyosatchilarni ozod qilishga chaqirdi.

Harbiylar, shuningdek, o‘tgan yilgi saylov natijalarini qayta tekshirish uchun saylov komissiyasini isloh qilishga va yangi saylovlardan so‘ng hokimiyatni saylangan partiyaga topshirishga va’da berdi.