Telegram asoschisi Pavel Durovning ma’lum qilishicha, messenjer sudyalar, prokuratura, xavfsizlik xizmati xodimlari va jurnalistlarning telefon raqami va manzillari e’lon qilinadigan kanallarni bloklab qo‘ygan. Bunga sabablardan biri sifatida Durov ushbu kanallarda zo‘ravonlikka chaqiriqlar borligini ko‘rsatdi, deb yozmoqda “RBK”.
“Telegram’dan bunday maqsadda foydalanish bizning zo‘ravonlikka ommaviy da’vatni taqiqlovchi siyosatimizga zid. Rossiyadagi vaziyatning nihoyatda murakkabligini hisobga olgan holda biz shoshmashosharlik bilan qaror qilib, ziyon keltirishni istamadik. Aksincha, vaziyatni sinchkovlik bilan tahlil qildik” — deya ta’kidlagan Durov.
Uning qo‘shimcha qilishicha, ushbu kanallarning mavjudligi messenjerning iOS versiyasi uchun favqulodda yangilanish funksiyasining ishlashiga imkon bermagan. Durovning yozishicha, Apple bunga norozilik bildirgan va Telegram ma’muriyati “muammoli kanallarni bloklashga” qaror qilgan.
Durov Telegram kanal mualliflariga murojaat qilib, “zo‘ravonlik chaqiruvlarini va boshqa shaxslarning shaxsiy ma’lumotlarini tarqatmaslik”ni so‘ragan.
“Biz siyosiy qarashlaridan qat’i nazar, barcha buzg‘unchilarga o‘z qoidalarimizni muntazam ravishda tatbiq qilib, Telegram’ni App Store va Google Play’da yangilab borishda davom etamiz”— dedi Durov.
So‘nggi ikki hafta ichida Rossiyada muxolifatchi Aleksey Navalniyni qo‘llab-quvvatlash uchun uch marotaba norozilik namoyishlari bo‘lib o‘tdi. Namoyishlar Navalniy “Iv Roshe” ishi bo‘yicha hibsga olinganidan keyin boshlangan.
Namoyishlar oldidan hukumat ijtimoiy tarmoqlarda noqonuniy xatti-harakatlarga da’vat, shu jumladan, voyaga yetmaganlarga qaratilgan chaqiriqlarni aniqlaganini ma’lum qilgan. Prokuratura iltimosiga binoan Roskomnadzor (OAVni nazorat qiluvchi federal xizmat) ijtimoiy tarmoqlarga, shu jumladan, “VKontakte”, Facebook, Instagram’ga o‘z sahifalaridagi mitingga chaqiriqlarni olib tashlashni so‘ragan.
Birinchi miting kuni Roskomnadzor tarmoqlar noqonuniy tarkibning deyarli 90 foizini olib tashlaganligi haqida xabar bergan, ammo ma’lum bo‘lishicha, ushbu tarmoqlar keyinchalik baribir jarimaga tortiladi. Ma’lumotlarga ko‘ra, oltita ijtimoiy tarmoq va YouTube videoxostingida jami 170 ta chaqiriq o‘chirilmagan.
Avvalroq Parler ijtimoiy tarmog‘i rahbari ishdan bo‘shatilgani haqida xabar berilgandi. Tarmoq Tramp tarafdorlari orasida ommalashgani uchun Apple, Google va Amazon tomonidan bloklangan.
Hindiston hukumati esa 1-fevral kuni mamlakatdagi namoyishlar fonida 250 ga yaqin hind akkauntini bloklagan. Hukumat sahifalarni zo‘ravonlikka da’vat etayotganida ayblagan.
Izoh (0)