Мьянмада интернетга уланишда узилишлар қайд этилди. Бу ҳақда NetBlocks халқаро нотижорат ташкилоти маълумотларига таяниб, «Известия» хабар берди.
«Мьянмада шанба куни маҳаллий вақт билан 10:00 ҳолатига кўра, иккинчи умумий интернет узилиши кузатиляпти", — дейилади NetBlocks’нинг Twitter саҳифасида.
Таъкидланишича, маҳаллий миқёсда интернетга кириш имкони 54 фоизгача тушиб кетди, фойдаланувчилар носозликлар ҳақида хабар бермоқда. Аввалроқ мамлакатнинг интернет провайдерлари «кейинги хабар берилгунча» ҳукумат буйруғи билан Twitter ва Instagram ижтимоий тармоқларига киришни блоклаб қўйган эди.
Reuters ахборот агентлигининг хабар беришича, ҳукумат талаби билан Facebook’нинг турли хил хизматларидан фойдаланиш имконияти чекланган.
Мьянма ҳарбийлари интернет провайдерларига Facebook’ни 4 февралдан 7 февралгача блоклаб қўйишни буюрган, чунки фойдаланувчилар Twitter ва Instagram каби ижтимоий тармоқлар орқали мамлакат ичида бўлаётган воқеаларга норозилигини билдирган эди.
Умумий равишда интернетда носозлик кузатилиши 31 январь куни мамлакатдаги ҳарбий тўнтариш ва бир неча расмийларнинг ҳибсга олиниши фонида кузатила бошлади.
1 февраль куни давлат раҳбари Вин Мин ва Аун Сан Су Чжи қамоққа олинди. Бу воқеа ҳукумат ва ҳарбийлар ўртасида кучайган бир неча кунлик зиддият натижасида содир бўлди. Ҳарбийларнинг таъкидлашича, 8 ноябрь куни мамлакатда ўтказилган сайловларда қонунбузарлик бўлган.
Ҳукумат раҳбари қўлга олингач мамлакатда бир йил муддатга фавқулодда ҳолат эълон қилинган. Президент вазифасини вақтинча бажарувчи этиб вице-президент Минт Шве тайинланди.
Аввалроқ Мьянмада ҳарбийлар ҳокимиятни эгаллаб олган ва бир йил муддатга фавқулодда ҳолат жорий қилингани, Мьянмада давлат тўнтаришидан кейин вақтинчалик президент тайинлангани ва Мьянма ҳарбийлари янги сайловлар ўтказиш режасини эълон қилгани ҳақида хабарлар берилган эди.
Изоҳ (0)