Qirg‘iziston milliy xavfsizlik xizmati rahbari Kamchibek Tashiyev davolanish uchun xorijga ketayotganini ma’lum qildi. Uning davolanish ta’tili 6-fevraldan boshlanadi, deya xabar bergan “Kloop.kg”.
“6-fevral kuni tongda shifokorim Kaldarbek Abdramanov tavsiyasi bilan davolanish uchun chet elga ketaman. Ketishga majburman, men uchun duo qilinglar”, — deb yozgan Kamchibek Tashiyev Facebook’dagi sahifasida.
Xabarga ko‘ra, amaldorda yurak bilan bog‘liq muammolar kuzatilgan. Tashiyev 2020-yil noyabr oyining oxirida ham kasalxonaga yotqizilgandi. U mamlakatda koronavirus pandemiyasi kuchaygan davrda o‘lim xavfini tug‘diradigan ikki tomonlama o‘tkir pnevmoniyani boshdan kechirgan.
Avvalroq Qirg‘izistonda bir hafta ichida ikkinchi sobiq bosh vazir hibsga olingani haqida xabar berilgan. Sobiq bosh vazir Kubanichbek Jumaliyev korrupsiya jinoyatlarini sodir etganlikda gumon qilinmoqda. Undan oldin Qirg‘izistonning yana bir sobiq bosh vaziri Muhammadkaliy Abilgaziyev noqonuniy yo‘llar bilan boylik orttirganlikda gumonlanib 26-yanvar kuni ushlangan va 28-yanvar kuni qamoqqa olingan, sud qaroriga ko‘ra 2021-yil 26-martga qadar qamoqda ushlab turiladi.
Eslatib o‘tamiz, 2021-yil 3-fevralda Qirg‘iziston parlamenti 41 yoshli Ulug‘bek Maripov nomzodini bosh vazir lavozimiga tasdiqlagan. Ulug‘bek Maripov bosh vazirlik kursisiga o‘tirganidan keyin o‘zining qondosh ukasi Baxitbek Maripovni O‘sh viloyatining Novqat tumani hokimligi lavozimidan chetlatgan.
Mavzuga doir:
- Qirg‘iziston prezidenti Mudofaa vazirligini qayta tuzishga qaror qildi
- Qirg‘iziston sobiq prezidenti So‘ronboy Jeenbekov rafiqasi bilan birga Umra safariga jo‘nab ketdi.
- Qirg‘iziston prezidenti matbuot xizmatining rahbari pora olish uchun tovlamachilik bilan shug‘ullanganlikda gumon qilinib hibsga olindi
Izoh (0)