O‘zbekistonda 13-iyun soat 23:00 dan 14-iyun soat 23:00 ga qadar koronavirusga chalinish bilan bog‘liq 114 ta holat qayd etildi.
Yangi kasallanish holatlari
Yangi kasallanganlarning- 81 nafari karantin muassasalarida;
- 27 nafari aholi orasida (Toshkent shahrida — 10 nafar, Surxondaryo viloyatida — 9 nafar, Toshkent viloyatida — 5 nafar, Buxoro viloyatida — 2 nafar hamda Sirdaryo viloyatida — 1 nafar);
- 6 nafari esa xalqaro yuk tashuvchi avtomashina haydovchilari orasida (Toshkent viloyatida — 5 nafar, Sirdaryo viloyatida — 1 nafar) aniqlangan.
Buxoro viloyatida qayd etilgan yangi 2 ta holat ham aholi orasida qayd etildi. Viloyatda 12-iyunda kuzatilgan kasallikka chalinish bilan bog‘liq 5 ta va 10-iyundagi 2 ta holat ham aholi orasida aniqlangandi.
Toshkent viloyatida aholi orasida ham, xalqaro yuk tashuvchi avtomashina haydovchilari orasida ham 5 tadan holat qayd etilgan bo‘lsa, Sirdaryo viloyatida aholi orasida va xalqaro yuk tashuvchi mashina haydovchilari orasida bittadan holat qayd etildi.
Surxondaryo viloyatida aholi orasida bir yo‘la 9 kishida koronavirus aniqlandi. Viloyat 20-maydan buyon “yashil” hudud edi. Koronavirus aniqlanganidan so‘ng viloyatda keng qamrovli dezinfeksiya ishlari boshlandi. Viloyatning tuman va shaharlarining “qizil”, “sariq” va “yashil” hududlari ro‘yxati yangilandi:
“Qizil” hududlar: Termiz shahri, Boysun, Muzrabot, Termiz va Sho‘rchi tumanlari.
“Sariq” hudud: Sariosiyo tumani.
“Yashil” hududlar: Angor, Bandixon, Denov, Jarqo‘rg‘on, Qiziriq, Qumqo‘rg‘on, Oltinsoy, Uzun va Sherobod tumanlari.
Iyun oyi davomida Qashqadaryo va Xorazm viloyatlari ham koronavirusdan xoli hudud maqomini yo‘qotgandi.
Kasallikdan davolanish
14-iyun kuni 69 nafar fuqaro sog‘aydi. Shundan 55 nafari Toshkent shahridagi, 10 nafari Buxoro viloyatidagi, 4 nafari Namangan viloyatidagi tibbiyot muassasalarida shifo topdi.Shifoxonalardagi 1118 nafar bemordan 897 nafari Toshkentdagi tibbiyot muassasalarida davolanmoqda (Sirdaryo viloyatidagi bemorlar ham Toshkent shahriga o‘tkazilgan). Qolgan 221 nafar bemor mamlakatning 9 hududidagi shifoxonalarda davolanmoqda.
Hozirda kasallik qayd etilgan jami 5080 nafar bemordan 3943 nafari sog‘ayib, davolanish ko‘rsatkichi 77 foizni tashkil etmoqda. Bu boradagi ko‘rsatkich bir foizga yomonlashdi.
Ma’lumot o‘rnida, Jizzax va Farg‘ona viloyatlari koronavirusdan xoli hudud bo‘lib turibdi. Qoraqalpog‘istonda 6, Buxoroda 8, Andijonda 9, Namanganda 11 va Xorazmda 14 nafar bemor qoldi.
Ahvoli og‘ir bemorlar
Ayni paytda tibbiyot muassasalarida davolanayotgan 1118 nafar bemordan 12 nafari og‘ir, 2 nafari esa o‘ta og‘ir ahvolda. Bir sutka ichida ahvoli og‘ir va o‘ta og‘ir bemorlar sonida o‘zgarish kuzatilmadi.15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan. Iyun oyining o‘zida 4 nafar bemor vafot etdi.
Karantingadilar
Hozirda O‘zbekistonda uy karantinida 28 297 nafar, statsionar karantinda esa 21 717 nafar fuqaro tibbiy kuzatuvda bo‘lib turibdi. Bir kun ichida uy karantinidagi fuqarolar soni 1337 nafarga ko‘paygan bo‘lsa, statsionar karantindagi fuqarolar soni 780 nafarga kamaydi.Shu kungacha karantinga olinganlar va karantindan chiqarilganlar haqidagi ma’lumotlarni SSV matbuot kotibi 12-iyundan boshlab berishni to‘xtatdi. Oxirgi marta 11-iyun kuni berilgan axborotda O‘zbekistonda 458 539 nafar fuqaro karantinga olingan bo‘lib, ularning 411 033 nafari karantindan chiqarilgani ma’lum qilingandi.
Mavzuga doir: O‘zbekistonda endi karantin xarajatlari karantin talablarini buzganlar tomonidan qoplanadi
Ayni vaqtda koronavirus infeksiyasi bilan kasallanish holatlari kamaygan (sariq reyslar) Yevropa Ittifoqi, Malayziya, Tailand, Singapurdan (oxirgi 14 kun ushbu mamlakatlarda bo‘lib turgan) kirib kelgan shaxslar 14 kun davomida uy karantini nazoratiga olinadi.
“Koronavirus infeksiyasi bilan kasallanish holatlari kamaymagan (qizil reylar — evakuatsiya reyslari) qolgan boshqa davlatlar, jumladan, BAA, Turkiya, Eron, Afg‘oniston, Rossiya va boshqa MDH davlatlaridan kirib kelgan shaxslar 14 kun davomida karantin nazoratida saqlanadi”, — deyiladi Respublika maxsus komissiyasi axborotida.
Izoh (0)