Toshkentda 19 ta yangi savdo-ko‘ngilochar majmuasi qurilmoqda, ularning umumiy maydoni 774,6 ming kvadrat metrga teng. Bu haqda Prezident Shavkat Mirziyoyev Olmazor tumanidagi loyihalar bilan tanishgan vaqtida bosh vazir o‘rinbosari, investitsiyalar va savdo vaziri Sardor Umrzoqov o‘z taqdimotida ma’lum qilgan, deb yozmoqda “Gazeta.uz”.
Investitsiyalar va tashqi savdo vazirining so‘zlariga ko‘ra, bugungi kunda Toshkentda maydoni 569,1 ming kvadrat metrga teng 30 ta savdo-ko‘ngilochar majmuasi faoliyat olib bormoqda. Taqdimotda yana 19 ta savdo-ko‘ngilochar majmuasini barpo qilish orqali umumiy maydonni 1,34 million kvadrat metrga yetkazish ko‘zda tutilgani qayd etilgan.
Savdo-ko‘ngilochar majmuasi soni 49 taga yetkazilganidan keyin shaharda savdo maydonlari bilan ta’minlanganlik darajasi 1000 aholiga 448 kvadrat metrga yetadi, deyilgan taqdimotda.
2019-yil noyabrda Orient kompaniyalar guruhi MAPIC ko‘rgazmasida tijorat ko‘chmas mulki potensialini namoyish etgan. Unga ko‘ra, Moskvada shahar aholisining savdo maydonlari bilan ta’minlaganlik darajasi 485 kvadrat metr, ya’ni Toshkentdan (45 kvadrat metr) 10 baravar ko‘p, Olmaotada esa 347 kvadrat metr, ya’ni 8 baravar ko‘pligi ma’lum qilingandi.
Vazirning taqdimotida 2021-yil IV choragida maydoni 80 ming kvadrat metrga teng Chuqursoy savdo va biznes-kompleksi hamda 2020-yil IV choragida Rivera savdo-ko‘ngilochar majmuasi foydalanishga topshirilishi ta’kidlab o‘tilgan.
Mavzuga doir:
Izoh (0)