Ўзбекистонда 13 июнь соат 23:00 дан 14 июнь соат 23:00 га қадар коронавирусга чалиниш билан боғлиқ 114 та ҳолат қайд этилди.
Янги касалланиш ҳолатлари
Янги касалланганларнинг- 81 нафари карантин муассасаларида;
- 27 нафари аҳоли орасида (Тошкент шаҳрида — 10 нафар, Сурхондарё вилоятида — 9 нафар, Тошкент вилоятида — 5 нафар, Бухоро вилоятида — 2 нафар ҳамда Сирдарё вилоятида — 1 нафар);
- 6 нафари эса халқаро юк ташувчи автомашина ҳайдовчилари орасида (Тошкент вилоятида — 5 нафар, Сирдарё вилоятида — 1 нафар) аниқланган.
Бухоро вилоятида қайд этилган янги 2 та ҳолат ҳам аҳоли орасида қайд этилди. Вилоятда 12 июнда кузатилган касалликка чалиниш билан боғлиқ 5 та ва 10 июндаги 2 та ҳолат ҳам аҳоли орасида аниқланганди.
Тошкент вилоятида аҳоли орасида ҳам, халқаро юк ташувчи автомашина ҳайдовчилари орасида ҳам 5 тадан ҳолат қайд этилган бўлса, Сирдарё вилоятида аҳоли орасида ва халқаро юк ташувчи машина ҳайдовчилари орасида биттадан ҳолат қайд этилди.
Сурхондарё вилоятида аҳоли орасида бир йўла 9 кишида коронавирус аниқланди. Вилоят 20 майдан буён «яшил» ҳудуд эди. Коронавирус аниқланганидан сўнг вилоятда кенг қамровли дезинфекция ишлари бошланди. Вилоятнинг туман ва шаҳарларининг «қизил», «сариқ» ва «яшил» ҳудудлари рўйхати янгиланди:
«Қизил» ҳудудлар: Термиз шаҳри, Бойсун, Музработ, Термиз ва Шўрчи туманлари.
«Сариқ» ҳудуд: Сариосиё тумани.
«Яшил» ҳудудлар: Ангор, Бандихон, Денов, Жарқўрғон, Қизириқ, Қумқўрғон, Олтинсой, Узун ва Шеробод туманлари.
Июнь ойи давомида Қашқадарё ва Хоразм вилоятлари ҳам коронавирусдан холи ҳудуд мақомини йўқотганди.
Касалликдан даволаниш
14 июнь куни 69 нафар фуқаро соғайди. Шундан 55 нафари Тошкент шаҳридаги, 10 нафари Бухоро вилоятидаги, 4 нафари Наманган вилоятидаги тиббиёт муассасаларида шифо топди.Шифохоналардаги 1118 нафар бемордан 897 нафари Тошкентдаги тиббиёт муассасаларида даволанмоқда (Сирдарё вилоятидаги беморлар ҳам Тошкент шаҳрига ўтказилган). Қолган 221 нафар бемор мамлакатнинг 9 ҳудудидаги шифохоналарда даволанмоқда.
Ҳозирда касаллик қайд этилган жами 5080 нафар бемордан 3943 нафари соғайиб, даволаниш кўрсаткичи 77 фоизни ташкил этмоқда. Бу борадаги кўрсаткич бир фоизга ёмонлашди.
Маълумот ўрнида, Жиззах ва Фарғона вилоятлари коронавирусдан холи ҳудуд бўлиб турибди. Қорақалпоғистонда 6, Бухорода 8, Андижонда 9, Наманганда 11 ва Хоразмда 14 нафар бемор қолди.
Аҳволи оғир беморлар
Айни пайтда тиббиёт муассасаларида даволанаётган 1118 нафар бемордан 12 нафари оғир, 2 нафари эса ўта оғир аҳволда. Бир сутка ичида аҳволи оғир ва ўта оғир беморлар сонида ўзгариш кузатилмади.15 мартда эпидемия бошланганидан бери Ўзбекистонда 19 нафар бемор COVID-19 асоратлари оқибатида вафот этган. Июнь ойининг ўзида 4 нафар бемор вафот этди.
Карантингадилар
Ҳозирда Ўзбекистонда уй карантинида 28 297 нафар, стационар карантинда эса 21 717 нафар фуқаро тиббий кузатувда бўлиб турибди. Бир кун ичида уй карантинидаги фуқаролар сони 1337 нафарга кўпайган бўлса, стационар карантиндаги фуқаролар сони 780 нафарга камайди.Шу кунгача карантинга олинганлар ва карантиндан чиқарилганлар ҳақидаги маълумотларни ССВ матбуот котиби 12 июндан бошлаб беришни тўхтатди. Охирги марта 11 июнь куни берилган ахборотда Ўзбекистонда 458 539 нафар фуқаро карантинга олинган бўлиб, уларнинг 411 033 нафари карантиндан чиқарилгани маълум қилинганди.
Мавзуга доир: Ўзбекистонда энди карантин харажатлари карантин талабларини бузганлар томонидан қопланади
Айни вақтда коронавирус инфекцияси билан касалланиш ҳолатлари камайган (сариқ рейслар) Европа Иттифоқи, Малайзия, Таиланд, Сингапурдан (охирги 14 кун ушбу мамлакатларда бўлиб турган) кириб келган шахслар 14 кун давомида уй карантини назоратига олинади.
«Коронавирус инфекцияси билан касалланиш ҳолатлари камаймаган (қизил рейлар — эвакуация рейслари) қолган бошқа давлатлар, жумладан, БАА, Туркия, Эрон, Афғонистон, Россия ва бошқа МДҲ давлатларидан кириб келган шахслар 14 кун давомида карантин назоратида сақланади», — дейилади Республика махсус комиссияси ахборотида.
Изоҳ (0)