O‘zbekistonda 11-iyun soat 23:00 dan 12-iyun soat 23:00 ga qadar koronavirusga chalinish bilan bog‘liq 128 ta holat qayd etildi.

Foto: Telegram / @ssvmatbuotkotibi

Yangi kasallanish holatlari

Kasallik qayd etilgan holatlarning

  • 94 tasi karantin muassasalarida;
  • 26 tasi aholi orasida (shundan 14 tasi Toshkent shahrida, 5 tasi Buxoro viloyatida, yana 5 tasi Toshkent viloyatida, 2 tasi Samarqand viloyatida);
  • 8 tasi esa xalqaro yuk tashuvchi avtomashina haydovchilari orasida (Toshkent viloyatida 8 ta, Sirdaryoda 1 ta) aniqlangan.

Yangi kasallikka chalinganlar soni 9-iyundan buyon o‘sib bormoqda: 9-iyunda 80 nafar, 10-iyunda 103 nafar, 11-iyunda 118 nafar va 12-iyunda 128 nafar bemor.

Andijon viloyatida 6-iyundan buyon endi koronavirusga chalinish holati qayd etildi. Karantin muassasasida bo‘lgan 5 kishida virus aniqlangan.

Bir kun avval Qashqadaryo viloyatida 28 ta yangi holat qayd etilgandi, ularning bari Muborak tumanida faoliyat ko‘rsatuvchi xorijiy korxonaning ishchilari edi. 12-iyun kuni viloyatdagi karantin muassasalarida saqlanayotgan yana 17 kishida koronavirus aniqlandi. SSV Qashqadaryodagi yangi kasallikka chalinish holatlariga izoh bermagan.

Aholi orasida koronavirus yuqtirib olish holatlari 11-iyunga nisbatan 12 taga, 10-iyunga nisbatan bittaga kamaydi.

Buxoro viloyatining 3 ta tumanida aholi orasida koronavirusga chalinish holatlari qayd etilgan. Jumladan, Shofirkon tumanida yashovchi fuqaro tana harorati ko‘tarilib, shifoxonaga murojaat qilgan va unda kasallik aniqlangan. Yana bir bemor Jondor tumanidagi “Vet-Farm” MChJ sotuvchisi hisoblanadi. Vobkent tumanida yashovchi fuqaro ham tana harorati ko‘tarilgani sababli tahlil topshirgan va unda kasallik borligi ma’lum bo‘lgan.

Shuningdek, Samarqand viloyati Urgut tumanida yashovchi 2 nafar fuqaroda ham koronavirus infeksiyasi tasdiqlangan. Ayni paytda ushbu holatlar yuzasidan epidemiologik surishtiruv ishlari olib borilmoqda.

Toshkent shahri har doimgidek aholi orasida koronavirusga chalinish bo‘yicha yuqori ko‘rsatkich qayd etdi. Poytaxtda 14 kishi koronavirusni yuqtirib olgan. SSV va Sanitariya-epidemiologik osoyishtalik agentligi Toshkent shahrida avvalgi kunlarda aholi orasida kasallikni yuqtirib olish bilan bog‘liq ba’zi tafsilotlarni oshkor etdi. Ma’lum bo‘lishicha, 7-iyun kuni Toshkentda koronavirus aniqlangan 195 bemorning 183 nafari bitta kompaniyada ishlayotgan quruvchilar bo‘lgan. Kasallik yuqtirib olgan 183 kishi bilan birga ishlovchi 300 nafardan ortiq xodim karantinga olingan. Mazkur 183 fuqaro Toshkent shahriga viloyatlardan kelib ishlayotgani va so‘nggi 14 kun ichida oila a’zolari bilan bevosita aloqada bo‘lmagani sababli ularning oila a’zolari karantinga olinmagan. Shuningdek, 11-iyun kuni Toshkent shahri Chilonzor tumanida yashovchi fuqaro ishga kirish maqsadida tahlildan o‘tganda, unda kasallik borligi aniqlangan. Shuningdek, Shayxontohur tumanidagi Mediapark savdo majmuasining yana bir sotuvchisida, Yunusobod dehqon bozorining yana 6 nafar sotuvchisida, Sergeli tumanida kasalligi tasdiqlangan taksi haydovchisining otasi va ukasida koronavirus aniqlangan.

Koronavirusdan davolanish

12-iyun davomida 121 nafar bemor koronavirusdan sog‘aydi. Shundan 120 nafari Toshkent shahridagi, 1 nafari esa Andijon viloyatidagi tibbiyot muassasalarida shifo topdi.

Bemorlarning 844 nafari Toshkent shahridagi davolash muassasalarida, 248 nafari esa O‘zbekistonning 8 hududidagi shifo maskanlarida davolanmoqda.

Hozirda kasallik qayd etilgan jami 4869 nafar bemordan 3758 nafari sog‘ayib, davolanish ko‘rsatkichi 77 foizni tashkil etmoqda.  Bu boradagi ko‘rsatkich 8-iyundan beri endi 1 foizga yaxshilandi.

Davolanish bo‘yicha foizdagi eng yomon ko‘rsatkich Qashqadaryoga tegishli bo‘lib, bu yerda bemorlarning 11 foizi (57 nafardan 6 nafari) davolanishga erishdi.

Ma’lumot o‘rnida, JizzaxSurxondaryo  va Farg‘ona viloyatlari koronavirusdan xoli hudud bo‘lib turibdi. 4 nafar bemor qolgan Qoraqalpog‘iston ham koronavirusdan xoli hududga aylanishga yaqin turibdi. Andijonda 8, Xorazmda 14, Namanganda 15, Buxoroda 16 nafar bemor qoldi.

Ahvoli og‘ir bemorlar

Ayni paytda tibbiyot muassasalarida davolanayotgan 1092 nafar bemordan 13 nafari og‘ir, 2 nafari esa o‘ta og‘ir ahvolda. O‘zbekistonda koronavirus qayd etilgan 15-martdan shu kungacha ahvoli og‘ir va o‘ta og‘ir bo‘lgan bemorlar soni bir vaqtda 15 nafarga yetmagandi.

Bir sutka avval ham ahvoli og‘ir bemorlar 10, ahvoli o‘ta og‘ir bemorlar 2 nafarni tashkil etayotgandi. Ammo 12-iyun soat 10:00 holatiga ko‘ra, ahvoli og‘ir bemorlar soni 2 nafarga oshgandi.

15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan. Iyun oyining o‘zida 4 nafar bemor vafot etdi.

Karantindagilar

SSV ma’lumotlariga ko‘ra, hozirda O‘zbekistonda uy karantinida 25 100 nafar, statsionar karantinda esa 23 628 nafar fuqaro tibbiy kuzatuvda bo‘lib turibdi.

Avvalgi kunlardan farqli o‘laroq Sog‘liqni saqlash vazirligi 12-iyungacha karantinga olinganlar va karantindan chiqarilganlar haqida ma’lumot bermadi. Oxirgi marta 11-iyun kuni berilgan axborotda O‘zbekistonda 458 539 nafar fuqaro karantinga olingan bo‘lib, ularning 411 033 nafari karantindan chiqarilgani ma’lum qilingandi.