Namangan viloyatida koronavirusdan tuzalgan bemorlar soni 258 nafarga yetdi. Uychi va Yangiqo‘rg‘on tumanlarida bemor qolmadi. Bu haqda viloyat hokimligi huzuridagi Koronavirus profilaktikasi shtabi ma’lum qildi.

Ma’lumotlarga ko‘ra, 14-iyun kuni koronavirus infeksiyasiga chalinib, Namangan viloyati yuqumli kasalliklar shifoxonasida davolanayotgan bemorlardan 4 nafari butunlay sog‘ayib, reabilitatsiyaga kuzatilgan.

Ularning bir nafari To‘raqo‘rg‘on tumanidan (1992-yilda tug‘ilgan ayol), bir nafari Yangiqo‘rg‘on tumanidan (1979-yilda tug‘ilgan erkak) va ikki nafari Uychi tumanidan (1960 va 1968-yilda tug‘ilgan ayollar).

“Bugungi kun holatiga ko‘ra, Uychi va Yangiqo‘rg‘on tumanida yashovchi koronavirus infeksiyasiga chalingan bemorlarning barchasi tuzaldi”, — deyiladi xabarda.

Viloyat bo‘yicha bugunga qadar koronavirusga chalingan jami 273 nafar fuqarodan 258 nafari (95 foiz) tuzaldi. 4 kishi vafot etgan. Hozirda viloyat yuqumli kasalliklari shifoxonasida 11 nafar — To‘raqo‘rg‘on tumanidan 3 nafar, Namangan shahridan, Namangan va Pop tumanlaridan 2 nafardan, Chust va Kosonsoy tumanlaridan 1 nafardan — bemor davolanmoqda.

Eslatib o‘tamiz, 3-iyun kuni Namangan shahrida koronavirus bilan kasallanganlarning barchasi sog‘aygani to‘g‘risida xabar berilgandi.

O‘zbekistonda 14-iyun soat 10:00 holatiga ko‘ra, koronavirusga chalinganlar soni 4994 nafarni tashkil etmoqda. Mamlakatda 15-martdan buyon koronavirusga chalingani aniqlangan shaxslarning 3874 nafari sog‘aygan, 19 nafari esa kasallik asoratlari oqibatida vafot etgan.