O‘zbekistonda 5-iyun soat 23:00 dan 6-iyun soat 23:00 gacha koronavirusga chalinish bilan bog‘liq 87 ta holat qayd etildi.
Yangi kasallanish holatlari
Koronavirus infeksiyasi tasdiqlangan 87 nafar bemorning
- 62 nafari karantin muassasalaridagi fuqarolar orasida;
- 20 nafari aholi orasida;
- 5 nafari xalqaro yuk tashuvchi avtomashina haydovchilarida aniqlangan.
Aholi orasidagi yangi kasallanish holatlarining 10 tasi Toshkent shahrida qayd etildi. Ushbu holatlarning ikkitasi Shayxontohur tumani Qoratosh ko‘chasida joylashgan Mediapark savdo majmuasining xodimlarida aniqlandi.
Bir kun avval bir nafar ichki ishlar xodimida koronavirus aniqlangan Namanganda 6-iyun kuni aholi orasida 6 ta yangi holat qayd etildi.
26-may kuni koronavirusdan xoli hududga aylangan Xorazm viloyatida 6-iyun kuni aholi orasida 3 ta kasallanish holati qayd etilib, viloyatga koronavirus qaytdi.
Xorazm kabi koronavirusdan xoli hudud maqomini yo‘qotgan Qashqadaryo viloyatida ketma-ket ikkinchi kun aholi orasida yangi holat qayd etildi. Viloyatda ishlovchi qozog‘istonlik fuqaro koronavirus yuqtirib olgani ma’lum bo‘ldi.
6-iyun kuni koronavirus qayd etilgan hududlar:
- Toshkent shahri — 57 ta holat;
- Namangan — 6;
- Toshkent viloyati — 5;
- Navoiy — 5;
- Sirdaryo — 4;
- Xorazm — 3;
- Samarqand — 3;
- Andijon — 3;
- Qashqadaryo — 1.
6-iyun davomida Toshkent shahridagi Virusologiya ilmiy-tekshirish instituti klinikasidan 21 nafar fuqaro sog‘ayib chiqdi.
Hozirda kasallik qayd etilgan jami 4094 nafar bemordan 3268 nafari sog‘aydi. Kun davomida yangi kasallanish holatlari sog‘ayganlardan ko‘p bo‘lgani uchun davolanish ko‘rsatkichi bir kun oldingi 81 foizdan 79 foizga tushib ketdi.
Ma’lumot o‘rnida, Jizzax, Surxondaryo va Farg‘ona viloyatlari koronavirusdan xoli hudud bo‘lib turibdi. 2 kun davomida Qashqadaryo va Xorazm ular safidan chiqib ketdi. Qoraqalpog‘iston (3 nafar bemor), Xorazm (3 nafar bemor), Andijon (4 nafar bemor) va Qashqadaryo (5 nafar bemor) koronavirusdan xoli hududga aylanishga yaqin turibdi.
Sirdaryo va Toshkent viloyatlaridagi bemorlar esa Toshkent shahrida davolanmoqda. Eng ko‘p bemor hozir aynan Toshkent shahrida (586 kishi) bo‘lib, davolanish ko‘rsatkichi 70 foizni tashkil etmoqda.
O‘lim holati va ahvoli og‘ir bemorlar
6-iyun kuni Toshkent shahrida 70 yoshli erkak koronavirusdan vafot etdi. Sh. ismli erkak 27-may kuni yo‘l-transport hodisasiga uchrab, tez tibbiy yordam mashinasida bosh miya yopiq jarohati dastlabki tashxisi bilan Respublika shoshilinch tibbiy yordam ilmiy markaziga olib kelingan. O‘sha paytda tana harorati yuqori bo‘lgan erkakda o‘tkazilgan tekshiruv natijasida unda koronavirus infeksiyasi qayd etilgan. Bemor avvaldan bosh miya o‘smasi, yurak ishemik va gipertoniya kasalligi, gepatit, pnevmoniya, surunkali yurak, buyrak va jigar yetishmovchiligi tashxisi bilan davolanib kelgan. So‘nggi kunlarda nafas yetishmovchiligining kuchayishi natijasida ahvoli keskin yomonlashgan bemor sun’iy nafas oldirish apparatiga olingan. 6-iyun kuni bemor miya shishi, o‘tkir nafas va yurak qon-tomir yetishmovchiligidan vafot etgan. U O‘zbekistonda koronavirusdan vafot etgan 17-bemor bo‘ldi.
Ayni paytda tibbiyot muassasalarida davolanayotgan 809 nafar bemordan 10 nafari og‘ir, 3 nafari esa o‘ta og‘ir ahvolda. Bir sutka avval ahvoli og‘ir bemorlar 12 nafarni, ahvoli o‘ta og‘ir bemorlar 1 nafarni tashkil etayotgandi.
Karantindagilar
Shu kungacha jami 438 602 nafar fuqaro karantinga olingan bo‘lib, ularning 394 310 nafari karantindan chiqarilgan. Bir kun ichida karantinga olinganlar soni 5488 nafarga ko‘paydi.
Hozirda O‘zbekistonda uy karantinida 23 313 nafar, statsionar karantinda esa 20 979 nafar fuqaro tibbiy kuzatuvda bo‘lib turibdi.
Izoh (0)