Kasallanganlar va vafot etganlar
Butun dunyo bo‘ylab koronavirus bilan kasallanganlar soni 128 ming kishidan oshib ketdi. Ulardan 68 mingdan ortig‘i davolanishga muvaffaq bo‘ldi, 4270 nafari vafot etgan. Virusning eng yirik o‘choqlari Xitoy (81 ming), Italiya (12,4 ming), Eron (10 ming), Janubiy Koreya (7,8 ming), Fransiya, Ispaniya va Germaniya (2 mingga yaqin) hamda AQSh (987 nafar bemor) davlatlari bo‘lmoqda.Qozog‘istonda ikki kishida koronavirus qayd etildi. Virus qayd etilgan ikkala qozog‘istonlik ham Germaniyadan qaytgan. Shuningdek, mamlakat Sog‘liqni saqlash vazirligi Milandan qaytgan bir ayolda ham infeksiya aniqlanganini ma’lum qilgandi.
Kanada bosh vazirining turmush o‘rtog‘i Sofi Greguar-Tryudoda yangi turdagi COVID-19 koronavirus infeksiyasi aniqlandi. “Shifokorlar tavsiyasidan so‘ng Sofi Greguar-Tryudo COVID-19 koronavirus uchun test topshirdi. Natijalar ijobiy chiqdi”, — deyiladi xabarda. Ta’kidlanishicha, Kanada bosh vazirining rafiqasi o‘zini yaxshi his qilmoqda. Bosh vazir Jastin Tryudoning ham ahvoli yaxshi, unda koronavirus alomatlari aniqlanmagan. U rafiqasi bilan 14 kun davomida karantinda bo‘ladi.
Italiyada koronavirusdan vafot etganlar soni ming nafardan oshdi. Mamlakat Yevropada COVID-19 koronavirusiga chalingan fuqarolar soni bo‘yicha yetakchilik qilmoqda.
Ozarbayjonda koronavirus bilan bog‘liq birinchi o‘lim holati kuzatildi. “Ayolda koronavirus infeksiyasi alomatlari aniqlangan va u karantinga joylashtirilgandi. Afsuski ayolning hayotini saqlab qolishning iloji bo‘lmadi”, — deyilgan xabarda.
Eron oliy yetakchisi Ali Xomanaiyning maslahatchisi Ali Akbar Viloyatiy koronavirus alomatlari kuzatilgani tufayli karantinga olindi. Xabarga ko‘ra, Viloyatiy o‘z uyida karantinda, uning ahvoli ancha yaxshi va sog‘lig‘i kundan kunga yaxshilanib bormoqda. Amaldorning kasallikni yuqtirib olgani yuzasidan boshqa tafsilotlar oshkor qilinmagan. Ali Akbar Viloyatiy Tehrondagi Masixa Donishvoriy kasalxonasining rahbari hisoblanadi.
Koronavirus infeksiyasi aniqlangan amerikalik aktyor Tom Xenks sog‘lig‘i qandayligi haqida o‘zining Twitter’dagi sahifasida ma’lum qildi. “Salom do‘stlar, men va Rita Uilson (aktyorning rafiqasi) hozirda bizga g‘amxo‘rlik qilayotgan barchaga minnatdorchilik bildirmoqchimiz. Bizda COVID-19 aniqlandi va kasallik boshqalarga tarqamasligi uchun karantindamiz”, — deb yozgan aktyor.
O‘zbekistondagi vaziyat
Ijtimoiy tarmoqlarda O‘zbekistonga koronavirus infeksiyasi kirib kelganligi, Olmaliq shahrida ushbu virus sababli 17 kishi vafot etgani haqida audioxabar tarqaldi. O‘zbekiston Sog‘liqni saqlash vazirligi mazkur xabarga munosabat bildirdi va uning mutlaqo asossiz va yolg‘on ekanligini ma’lum qildi.
O‘zbekiston koronavirusga qarshi kurashda yordam berish maqsadida Eronga insonparvarlik yordamini jo‘natadi. Mazkur gumanitar yordam Eron hukumatining koronavirus kasalligi tarqalishini bartaraf etish uchun zarur buyum va vositalar bilan ta’minlashda yordam ko‘rsatish yuzasidan murojaatini qo‘llab-quvvatlash maqsadida jo‘natiladi.
O‘zbekistonning Bangkok shahridagi bosh konsulxonasi bergan ma’lumotga ko‘ra, Tailand Qirolligi hukumati COVID-19 koronavirusining tarqalishi munosabati bilan 18 ta davlat, jumladan, O‘zbekiston fuqarolari uchun mamlakat aeroportlarida kirish vizalarini (Visa on Arrival) rasmiylashtirish tartibini bekor qildi. Tailand kirish vizalarini qirollikning xorijdagi diplomatik vakolatxonalarida rasmiylashtirishni tavsiya qilmoqda.
Uzbekistan Airways aviakompaniyasi O‘zbekistonga bir qator mamlakatlardan yo‘lovchilar kirib kelishi bo‘yicha o‘rnatilgan cheklovlar sabab 2020-yilning mart—aprel oylarida Parij, London, Frankfurt, Tel-Aviv, Bangkok, Kuala-Lumpurdan bo‘lgan milliy avialiniyalar orqali safarni rejalashtirayotgan xorij davlatlari fuqarolari uchun aviachiptalarni jarima to‘lovisiz qaytarish imkoniyati taqdim etilishini xabar qildi.
O‘zbekiston jurnalistika va ommaviy kommunikatsiyalar universitetida qo‘l berib ko‘rishish taqiqlandi. Universitet rektorining buyrug‘iga ko‘ra, endilikda har qanday taktil aloqa shakllari taqiqlanadi, — deyiladi xabarda.
O‘zbekistonda Navro‘z sayillari va umumxalq hashari bekor qilinmaydi. Biroq, koronavirus xavfi tufayli xavfsizlik nuqtayi nazaridan bir qator mahalliy va xalqaro darajadagi, chet ellik mehmonlar ishtirokidagi tadbirlar bekor qilindi.
Jahondagi vaziyat
Xitoylik shifokorlar koronavirus bepushtlikka olib kelishi mumkinligini ma’lum qildi. Mazkur ma’lumot Xubey provinsiyasi hukumatining saytida paydo bo‘lgan, biroq ijtimoiy tarmoqlardagi jo‘shqin muhokamalardan so‘ng hujjat darhol o‘chirib tashlangan.
Qozog‘istonliklarning o‘zlari gipermarketlarda ajiotaj keltirib chiqarib, oziq-ovqat mahsulotlari narxining qimmatlashishiga sabab bo‘lmoqda. Bunga 11—16-mart kunlari Qozog‘istonda koronavirusga chalinish holatlari qayd etilishi mumkinligi to‘g‘risidagi bayonot sabab bo‘lgan. “Odamlarning o‘zi narxlarning oshishiga sabab bo‘lmoqda”, – deydi Olmaota ma’muriyati koronavirus sabab yuzaga kelayotgan ajiotaj haqidagi munosabatida.
Qozog‘iston fuqarolariga qo‘l berib ko‘rishmaslik tavsiya qilindi. Shuningdek, fuqarolarga ommaviy tadbirlarga bormaslik tavsiya etilmoqda.
Turkmaniston bilan chegaralarning yopilishi ortidan Qozog‘istonda pomidor va bodring qimmatlashgani kuzatilmoqda. Rasmiylarning fikricha, mintaqadagi vaziyatni koronavirus va dollar kursining oshishi ham og‘irlashtirgan.
Qirg‘iziston hukumati koronavirus qayd etilgan davlatlarga borgan xorijliklarning mamlakatga kirishini taqiqladi. Vazirlikning ma’lum qilishicha, O‘zbekistonning Bishkek shahridagi elchixonasiga Qirg‘iziston Tashqi ishlar vazirligining notasi kelib tushgan. Mazkur notaga ko‘ra, 2020-yil 1-martdan boshlab so‘nggi 30 kun ichida COVID-19 koronavirusi bilan kasallanishning o‘sishi va uning tarqalishi kuzatilayotgan davlatlarga borgan xorijiy fuqarolar va fuqaroligi yo‘q shaxslarning Qirg‘iziston davlat chegarisidan o‘tkazish punktlari orqali ushbu mamlakatga kirishi uchun vaqtinchalik cheklovlar joriy qilingan. Mazkur cheklovlar mamlakat hukumati qarori asosida amalga kiritilgan.
Ko‘rishni qat’iy tavsiya qilamiz: Koronavirus tufayli hindcha salomlashayotgan Tramp, gazniqobdagi o‘quvchi, 100-qavatdagi kuzatuv maydoni. 12-martning eng qiziqarli suratlari
Rossiyada COVID-19 koronavirusi tarqalishi fonida prezident Vladimir Putinni himoya qilish uchun barcha zarur chora-tadbirlar ko‘rilmoqda. Bu haqda Putinning matbuot kotibi Dmitriy Peskov ma’lum qilgan. Uning qo‘shimcha qilishicha, prezident Fransiyaga borib kelganidan keyin karantinga olingan deputat Sergey Katasonov bilan aloqa qilmagan.
Prezidentga ko‘rsatiladigan tibbiy xizmat qandaydir epidemiologik vaziyat bilan bog‘liq emas. U har doim, muntazam amalga oshiriladi. Shuning uchun prezidentni mavsumiy, boshqa kasalliklardan himoya qilish uchun hamma choralar ko‘rilmoqda.Turkiyada koronavirus tufayli barcha ta’lim muassasalari yopildi. Shuningdek, mamlakatda ommaviy tadbirlar o‘tkazish ham taqiqlandi.Dmitriy Peskov, Rossiya prezidenti matbuot kotibi
Emmanuel Makron koronavirus sabab Fransiyadagi barcha ta’lim muassasalarini yopish bo‘yicha topshiriq berdi. Makronning ta’kidlashicha, 62 ming ta’lim muassasasi yopiladi. “Bir necha haftadan buyon mamlakatimiz virus tarqalishiga duch kelmoqda. Ushbu epidemiya so‘nggi yuz yil ichida sog‘liqni saqlash sohasidagi eng jiddiy inqirozga aylandi”, — deydi Fransiya prezidenti.
Oq uy Trampni koronavirus bilan kasallangan odamning tashrifidan keyin tekshirishdan bosh tortdi. Oq uy matbuot kotibi Stefani Grishem AQSh prezidentining koronavirus uchun tekshirish zarurati yo‘qligini ma’lum qilgan.
Xitoy sog‘liqni saqlash va gigiyena masalalari bo‘yicha davlat qo‘mitasi raisi Mi Fenga mamlakatda koronavirus tarqalishining eng yuqori cho‘qqisi ortda qolganini ma’lum qildi. Uning so‘zlariga ko‘ra, koronavirusga chalinishning yangi holatlari kamaymoqda.
Sportdagi vaziyat
Chexiyada ko‘plab tadbirlar qatori sport bellashuvlari, xususan, futbol chempionati ham koronavirus sababli qoldirildi. Shuningdek, Niderlandiyada ham futbol chempionati qoldirilgani haqida xabar berildi.Koronavirus Premyer Liga grandlariga ham xavf solishni boshladi: “Arsenal” bosh murabbiyi va “Chelsi” hujumchisida koronavirus aniqlandi.
Har kuni kechqurun faqat bitta xabar jo‘natamiz. “Daryo” oqshomi — kun davomida ro‘y bergan barcha voqea-hodisalar dayjesti Telegram-kanali: @daryooqshomi
Izoh (0)