Касалланганлар ва вафот этганлар
Бутун дунё бўйлаб коронавирус билан касалланганлар сони 128 минг кишидан ошиб кетди. Улардан 68 мингдан ортиғи даволанишга муваффақ бўлди, 4270 нафари вафот этган. Вируснинг энг йирик ўчоқлари Хитой (81 минг), Италия (12,4 минг), Эрон (10 минг), Жанубий Корея (7,8 минг), Франция, Испания ва Германия (2 мингга яқин) ҳамда АҚШ (987 нафар бемор) давлатлари бўлмоқда.Қозоғистонда икки кишида коронавирус қайд этилди. Вирус қайд этилган иккала қозоғистонлик ҳам Германиядан қайтган. Шунингдек, мамлакат Соғлиқни сақлаш вазирлиги Миландан қайтган бир аёлда ҳам инфекция аниқланганини маълум қилганди.
Канада бош вазирининг турмуш ўртоғи Софи Грегуар-Трюдода янги турдаги COVID-19 коронавирус инфекцияси аниқланди. «Шифокорлар тавсиясидан сўнг Софи Грегуар-Трюдо COVID-19 коронавирус учун тест топширди. Натижалар ижобий чиқди», — дейилади хабарда. Таъкидланишича, Канада бош вазирининг рафиқаси ўзини яхши ҳис қилмоқда. Бош вазир Жастин Трюдонинг ҳам аҳволи яхши, унда коронавирус аломатлари аниқланмаган. У рафиқаси билан 14 кун давомида карантинда бўлади.
Италияда коронавирусдан вафот этганлар сони минг нафардан ошди. Мамлакат Европада COVID-19 коронавирусига чалинган фуқаролар сони бўйича етакчилик қилмоқда.
Озарбайжонда коронавирус билан боғлиқ биринчи ўлим ҳолати кузатилди. «Аёлда коронавирус инфекцияси аломатлари аниқланган ва у карантинга жойлаштирилганди. Афсуски аёлнинг ҳаётини сақлаб қолишнинг иложи бўлмади», — дейилган хабарда.
Эрон олий етакчиси Али Хоманаийнинг маслаҳатчиси Али Акбар Вилоятий коронавирус аломатлари кузатилгани туфайли карантинга олинди. Хабарга кўра, Вилоятий ўз уйида карантинда, унинг аҳволи анча яхши ва соғлиғи кундан кунга яхшиланиб бормоқда. Амалдорнинг касалликни юқтириб олгани юзасидан бошқа тафсилотлар ошкор қилинмаган. Али Акбар Вилоятий Теҳрондаги Масиха Донишворий касалхонасининг раҳбари ҳисобланади.
Коронавирус инфекцияси аниқланган америкалик актёр Том Хенкс соғлиғи қандайлиги ҳақида ўзининг Twitter’даги саҳифасида маълум қилди. «Салом дўстлар, мен ва Рита Уилсон (актёрнинг рафиқаси) ҳозирда бизга ғамхўрлик қилаётган барчага миннатдорчилик билдирмоқчимиз. Бизда COVID-19 аниқланди ва касаллик бошқаларга тарқамаслиги учун карантиндамиз», — деб ёзган актёр.
Ўзбекистондаги вазият
Ижтимоий тармоқларда Ўзбекистонга коронавирус инфекцияси кириб келганлиги, Олмалиқ шаҳрида ушбу вирус сабабли 17 киши вафот этгани ҳақида аудиохабар тарқалди. Ўзбекистон Соғлиқни сақлаш вазирлиги мазкур хабарга муносабат билдирди ва унинг мутлақо асоссиз ва ёлғон эканлигини маълум қилди.
Ўзбекистон коронавирусга қарши курашда ёрдам бериш мақсадида Эронга инсонпарварлик ёрдамини жўнатади. Мазкур гуманитар ёрдам Эрон ҳукуматининг коронавирус касаллиги тарқалишини бартараф этиш учун зарур буюм ва воситалар билан таъминлашда ёрдам кўрсатиш юзасидан мурожаатини қўллаб-қувватлаш мақсадида жўнатилади.
Ўзбекистоннинг Бангкок шаҳридаги бош консулхонаси берган маълумотга кўра, Таиланд Қироллиги ҳукумати COVID-19 коронавирусининг тарқалиши муносабати билан 18 та давлат, жумладан, Ўзбекистон фуқаролари учун мамлакат аэропортларида кириш визаларини (Visa on Arrival) расмийлаштириш тартибини бекор қилди. Таиланд кириш визаларини қиролликнинг хориждаги дипломатик ваколатхоналарида расмийлаштиришни тавсия қилмоқда.
Uzbekistan Airways авиакомпанияси Ўзбекистонга бир қатор мамлакатлардан йўловчилар кириб келиши бўйича ўрнатилган чекловлар сабаб 2020 йилнинг март—апрель ойларида Париж, Лондон, Франкфурт, Тель-Авив, Бангкок, Куала-Лумпурдан бўлган миллий авиалиниялар орқали сафарни режалаштираётган хориж давлатлари фуқаролари учун авиачипталарни жарима тўловисиз қайтариш имконияти тақдим этилишини хабар қилди.
Ўзбекистон журналистика ва оммавий коммуникациялар университетида қўл бериб кўришиш тақиқланди. Университет ректорининг буйруғига кўра, эндиликда ҳар қандай тактиль алоқа шакллари тақиқланади, — дейилади хабарда.
Ўзбекистонда Наврўз сайиллари ва умумхалқ ҳашари бекор қилинмайди. Бироқ, коронавирус хавфи туфайли хавфсизлик нуқтаи назаридан бир қатор маҳаллий ва халқаро даражадаги, чет эллик меҳмонлар иштирокидаги тадбирлар бекор қилинди.
Жаҳондаги вазият
Хитойлик шифокорлар коронавирус бепуштликка олиб келиши мумкинлигини маълум қилди. Мазкур маълумот Хубэй провинцияси ҳукуматининг сайтида пайдо бўлган, бироқ ижтимоий тармоқлардаги жўшқин муҳокамалардан сўнг ҳужжат дарҳол ўчириб ташланган.
Хитой Соғлиқни сақлаш миллий комиссияси махсус экпертлар гуруҳи раҳбари Чжун Наншан янги турдаги COVID-19 коронавирус пандемияси 2020 йилнинг июнь ойига бориб пасайишни бошлашини маълум қилди. Унинг сўзларига кўра, бу касаллик тарқалишига қарши курашиш учун барча кучларни сафарбар этилишини талаб қилади.
Қозоғистонликларнинг ўзлари гипермаркетларда ажиотаж келтириб чиқариб, озиқ-овқат маҳсулотлари нархининг қимматлашишига сабаб бўлмоқда. Бунга 11—16 март кунлари Қозоғистонда коронавирусга чалиниш ҳолатлари қайд этилиши мумкинлиги тўғрисидаги баёнот сабаб бўлган. «Одамларнинг ўзи нархларнинг ошишига сабаб бўлмоқда», – дейди Олмаота маъмурияти коронавирус сабаб юзага келаётган ажиотаж ҳақидаги муносабатида.
Қозоғистон фуқароларига қўл бериб кўришмаслик тавсия қилинди. Шунингдек, фуқароларга оммавий тадбирларга бормаслик тавсия этилмоқда.
Туркманистон билан чегараларнинг ёпилиши ортидан Қозоғистонда помидор ва бодринг қимматлашгани кузатилмоқда. Расмийларнинг фикрича, минтақадаги вазиятни коронавирус ва доллар курсининг ошиши ҳам оғирлаштирган.
Қирғизистон ҳукумати коронавирус қайд этилган давлатларга борган хорижликларнинг мамлакатга киришини тақиқлади. Вазирликнинг маълум қилишича, Ўзбекистоннинг Бишкек шаҳридаги элчихонасига Қирғизистон Ташқи ишлар вазирлигининг нотаси келиб тушган. Мазкур нотага кўра, 2020 йил 1 мартдан бошлаб сўнгги 30 кун ичида COVID-19 коронавируси билан касалланишнинг ўсиши ва унинг тарқалиши кузатилаётган давлатларга борган хорижий фуқаролар ва фуқаролиги йўқ шахсларнинг Қирғизистон давлат чегарисидан ўтказиш пунктлари орқали ушбу мамлакатга кириши учун вақтинчалик чекловлар жорий қилинган. Мазкур чекловлар мамлакат ҳукумати қарори асосида амалга киритилган.
Кўришни қатъий тавсия қиламиз: Коронавирус туфайли ҳиндча саломлашаётган Трамп, газниқобдаги ўқувчи, 100-қаватдаги кузатув майдони. 12 мартнинг энг қизиқарли суратлари
Россияда COVID-19 коронавируси тарқалиши фонида президент Владимир Путинни ҳимоя қилиш учун барча зарур чора-тадбирлар кўрилмоқда. Бу ҳақда Путиннинг матбуот котиби Дмитрий Песков маълум қилган. Унинг қўшимча қилишича, президент Францияга бориб келганидан кейин карантинга олинган депутат Сергей Катасонов билан алоқа қилмаган.
Президентга кўрсатиладиган тиббий хизмат қандайдир эпидемиологик вазият билан боғлиқ эмас. У ҳар доим, мунтазам амалга оширилади. Шунинг учун президентни мавсумий, бошқа касалликлардан ҳимоя қилиш учун ҳамма чоралар кўрилмоқда.Туркияда коронавирус туфайли барча таълим муассасалари ёпилди. Шунингдек, мамлакатда оммавий тадбирлар ўтказиш ҳам тақиқланди.Дмитрий Песков, Россия президенти матбуот котиби
Эммануэль Макрон коронавирус сабаб Франциядаги барча таълим муассасаларини ёпиш бўйича топшириқ берди. Макроннинг таъкидлашича, 62 минг таълим муассасаси ёпилади. «Бир неча ҳафтадан буён мамлакатимиз вирус тарқалишига дуч келмоқда. Ушбу эпидемия сўнгги юз йил ичида соғлиқни сақлаш соҳасидаги энг жиддий инқирозга айланди», — дейди Франция президенти.
Оқ уй Трампни коронавирус билан касалланган одамнинг ташрифидан кейин текширишдан бош тортди. Оқ уй матбуот котиби Стефани Гришем АҚШ президентининг коронавирус учун текшириш зарурати йўқлигини маълум қилган.
Хитой соғлиқни сақлаш ва гигиена масалалари бўйича давлат қўмитаси раиси Ми Фенга мамлакатда коронавирус тарқалишининг энг юқори чўққиси ортда қолганини маълум қилди. Унинг сўзларига кўра, коронавирусга чалинишнинг янги ҳолатлари камаймоқда.
Спортдаги вазият
Мавзуга доир: Коронавирус ва футбол: Қолдирилган АПЛ, ЕЧЛ ва Европа Лигаси, вирус юқтирган Артета ва Ҳадсон-Одои ҳақида сўнгги маълумотлар
Коронавирус Премьер Лига грандларига ҳам хавф солишни бошлади: «Арсенал» бош мураббийи ва «Челси» ҳужумчисида коронавирус аниқланди.
Ҳар куни кечқурун фақат битта хабар жўнатамиз. «Дарё» оқшоми — кун давомида рўй берган барча воқеа-ҳодисалар дайжести Telegram-канали: @daryooqshomi
Изоҳ (0)