Vazirlar Mahkamasida Navro‘z umumxalq bayramiga tayyorgarlik ko‘rish va uni o‘tkazish, jamoat tartibini saqlash hamda aholi xavfsizligini ta’minlash bilan bog‘liq masalalar muhokamasiga bag‘ishlangan videoselektor yig‘ilishi bo‘lib o‘tdi. Bu haqda Hukumat portali xabar berdi.
Yig‘ilishda Shavkat Mirziyoyevning “2020-yilgi Navro‘z umumxalq bayramiga tayyorgarlik ko‘rish va uni o‘tkazish to‘g‘risida” 2020-yil 3-martdagi qarorida belgilangan vazifalardan kelib chiqib, bayram “Navro‘zing — yangi kun, yangi davroning muborak, jonajon O‘zbekistonim!” degan bosh g‘oya o‘zida mujassam etgan holda yuqori saviyada, xalq sayli ko‘rinishida tashkil etilishi qayd etilgan.
Unga ko‘ra, joylarda ko‘chma savdo do‘konlari, hunarmandchilik ko‘rgazmalari, kitob rastalari, bahoriy taom sotiladigan ochiq oshxonalar tashkil etiladi, milliy chorpoyalar, so‘rilar va xontaxtalar joylashtiriladi. Bog‘larda, ochiq maydonlarda dorbozlar, polvonlar, masxarabozlar, qo‘g‘irchoqbozlarning tomoshalari, qushlar ko‘rgazmasi, varrak uchirish, arqon tortish, arg‘imchoq uchish kabi xalq o‘yinlari musobaqalari tashkil etiladi.
Sayl davomida mamlakatda istiqomat qiladigan turli millat vakillarining badiiy chiqishlari, folklor-etnografik guruhlarning konsertlari ham o‘tkaziladi.
Shu bilan birgalikda, koronavirus xavfi tufayli xavfsizlik nuqtayi nazaridan bir qator mahalliy va xalqaro darajadagi, chet ellik mehmonlar ishtirokidagi tadbirlar bekor qilinmoqda.
“Navro‘z umumxalq bayrami oldidan xayriya hashari o‘tkazilishi an’anaga aylangan. Yig‘ilishda joriy yilning 14—15-mart kunlari “Obod yurt” umumxalq obodonlashtirish va ko‘kalamzorlashtirish xayriya hasharini uyushqoqlik bilan tashkil etish va yuqori saviyada o‘tkazish masalalari ham muhokama qilindi.
Asosiy bayram tadbirlari va xalq sayllari o‘tkaziladigan joylarda yangi turdagi COVID-19 koronavirusining kirib kelishi va tarqalishining oldini olish maqsadida tegishli profilaktik choralar ko‘riladi, tibbiy nazorat kuchaytiriladi. Shu bilan birga, mazkur yuqumli infeksiya inobatga olinib, xavfsizlik nuqtayi nazaridan bir qator mahalliy va xalqaro darajadagi, chet ellik mehmonlar ishtirokidagi tadbirlar bekor qilinmoqda”, — deyiladi xabarda.
Xususan, bayram arafasida Toshkent shahrida o‘tadigan Navro‘z marafoni, Xiva shahrida 31-mart va 1-aprel kunlari tashkil etiladigan “2020-yilda Xiva shahri turkiy dunyo madaniyati poytaxti” yilining rasmiy ochilish marosimi hamda “Buxoro shahri — Islom olami madaniyati poytaxti”, deb e’lon qilinishi munosabati bilan 14—16-aprel kunlari o‘tkaziladigan tadbirlar bekor qilindi.
Avvalroq Ozarbayjonda koronavirus sabab Navro‘z bayrami tadbirlari bekor qilingani, Qirg‘izistonda va Qozog‘istonda ham ommaviy tadbirlar o‘tkazish taqiqlangani xabar berilgan edi.
Izoh (0)