Emmanuel Makron koronavirus sabab Fransiyadagi barcha ta’lim muassasalarini yopish bo‘yicha topshiriq berdi

Fransiya prezidenti Emmanuel Makron COVID-19 koronavirusining tarqalishi sabab 16-martdan boshlab mamlakatdagi barcha ta’lim muassasalarini yopish bo‘yicha topshiriq berdi, deb xabar qiladi Le Figaro gazetasi.

Xususan, gap bog‘cha, maktab, kollej, litsey va universitetlar haqida ketmoqda. Makronning ta’kidlashicha, 62 ming ta’lim muassasasi yopiladi. “Bir necha haftadan buyon mamlakatimiz virus tarqalishiga duch kelmoqda. Ushbu epidemiya so‘nggi yuz yil ichida sog‘liqni saqlash sohasidagi eng jiddiy inqirozga aylandi”, — deydi Fransiya prezidenti.

U epidemiyani to‘xtatish uchun davlat barcha kerakli choralarni ko‘rishini aytib, inson sog‘lig‘i bebaho ekanligini ta’kidlagan. Fransiya prezidenti surunkali kasallar va nafas olish tizimidan aziyat chekuvchilarni, shuningdek, qariya va nogironligi bo‘lgan shaxslarni iloji boricha uydan chiqmaslikka chaqirdi.

So‘nggi ma’lumotlarga ko‘ra, Fransiyada koronavirus bilan kasallanganlar soni 2876 kishiga yetgan. Kasallik oqibatida vafot etganlar soni 61 kishini tashkil etmoqda.

Avvalroq Fransiya parlamentining to‘rt deputatida koronavirus aniqlangani haqida xabar berilgandi. Fransiya hududida koronavirusining tarqalishi munosabati bilan O‘zbekistonning Parijdagi elchixonasi huzurida ishchi guruh shakllantirildi. Fransiyadagi O‘zbekiston fuqarolari bilan muntazam muloqot o‘rnatilgan bo‘lib, ular uchun Telegram’da France-uz guruhi tuzilgan.