Samarqand viloyati Samarqand tumanida yashovchi yigit “Odnoklassniki.ru” ijtimioy tarmog‘i imkoniyatlaridan shaxsiy manfaatlari yo‘lida foydalanmoqchi bo‘ldi, deya xabar bermoqda “Kun.uz” “Huquq” gazetasiga tayanib.
Xabar berishlaricha, yigit bir qizga tarmoq orqali “do‘stlik taklifi”ni yuborgan, ular ma’lum muddat muloqot qilgan, bu orada qizning ishonchiga kirgan yigit qizning suratlarini o‘z kompyuteriga yuklab olgan.
So‘ng “Odnoklassniki”da o‘sha qiz nomidan yangi profil ochib, uning suratlarini yuklab, suratlar yoniga “inson sha’ni va qadr-qimmatini tahqirlovchi so‘zlar”ni yozib qo‘ygan.
Bundan xabar topgan qiz yigitga yalinib, bu profilni o‘chirishni so‘ragan, yigit esa bunga javoban har kuni telefon raqamiga pul tashlab turishni talab qilgan.
Shundan so‘ng qizning onasi yigitga telefon qilib, profilni o‘chirishni so‘ragan, yigit esa bu safar qizning onasidan tuman markazida Paynet shoxobchasi ochib berishni talab qilgan, yo‘qsa ayolning qizi sharmanda bo‘lishi bilan tahdid qilgan.
“O‘z sha’ni va qadrining oyoq osti bo‘layotganidan jahli chiqqan qiz huquqni muhofaza qilish organlariga murojaat qilishga majbur bo‘ldi. Sud yigitni aybiga yarasha jazoladi”, – deyiladi gazeta xabarida.
Izoh (0)