Самарқанд вилояти Самарқанд туманида яшовчи йигит «Odnoklassniki.ru» ижтимиой тармоғи имкониятларидан шахсий манфаатлари йўлида фойдаланмоқчи бўлди, дея хабар бермоқда «Kun.uz» «Ҳуқуқ» газетасига таяниб.
Хабар беришларича, йигит бир қизга тармоқ орқали «дўстлик таклифи»ни юборган, улар маълум муддат мулоқот қилган, бу орада қизнинг ишончига кирган йигит қизнинг суратларини ўз компьютерига юклаб олган.
Сўнг «Одноклассники»да ўша қиз номидан янги профиль очиб, унинг суратларини юклаб, суратлар ёнига «инсон шаъни ва қадр-қимматини таҳқирловчи сўзлар»ни ёзиб қўйган.
Бундан хабар топган қиз йигитга ялиниб, бу профилни ўчиришни сўраган, йигит эса бунга жавобан ҳар куни телефон рақамига пул ташлаб туришни талаб қилган.
Шундан сўнг қизнинг онаси йигитга телефон қилиб, профилни ўчиришни сўраган, йигит эса бу сафар қизнинг онасидан туман марказида Paynet шохобчаси очиб беришни талаб қилган, йўқса аёлнинг қизи шарманда бўлиши билан таҳдид қилган.
«Ўз шаъни ва қадрининг оёқ ости бўлаётганидан жаҳли чиққан қиз ҳуқуқни муҳофаза қилиш органларига мурожаат қилишга мажбур бўлди. Суд йигитни айбига яраша жазолади», – дейилади газета хабарида.
Изоҳ (0)