Farg‘ona viloyati Dang‘ara tumanida voyaga yetmagan farzandini sotishga uringan ayol ushlandi, deb xabar beradi viloyati IIB axborot xizmati.
Ma’lum qilinishicha, 28-mart kuni tuman IIBga kelib tushgan ariza bo‘yicha tezkor tadbir o‘tkazilgan. Tadbir davomida 2 yoshli qizini 14 ming dollarga sotmoqchi bo‘lgan ayol qo‘lga olingan va tegishli tartibda hujjatlar rasmiylashtirilgan.
Holat yuzasidan Dang‘ara tumani IIB Tergov bo‘linmasi tomonidan ayolga nisbatan Jinoyat kodeksining 135-moddasi (odam savdosi) 3-qismi “a” bandi bilan jinoyat ishi qo‘zg‘atilib, “qamoqqa olish” ehtiyot chorasi qo‘llanilgan. Hozirda tergov harakatlari davom ettirilmoqda.
Bundan oldin Toshkent viloyatida bir yoshli o‘g‘lini 9 ming dollarga sotishga uringan er-xotinga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani hamda Navoiyda farzandini 85 million so‘mga sotishga uringan er-xotin jinoyat ustida qo‘lga olingani haqida xabar berilgandi.
Izoh (0)