Toshkentda bir oylik chaqalog‘ini 35 ming dollarga sotgan ayol ushlandi

Toshkent va Sirdaryoda farzandini sotishga uringan ayollar ushlandi. Bu haqda DXX matbuot xizmati xabar berdi.

DXX va IIV xodimlari tomonidan o‘tkazilgan tezkor tadbirda Toshkent shahrida yashovchi A.Sh. (1994-yilda tug‘ilgan) 15-iyun kuni tug‘ilgan farzandini 35 ming dollarga sotib, kelgusida bolani qaytarib olish uchun da’vo qilmaslik bo‘yicha tilxat yozib bergan vaqtida ushlangan.

Shuningdek, uning mazkur noqonuniy harakatini amalga oshirishida yordam bergani uchun 200 dollar olgan tug‘ruqxona shifokori ham qo‘lga olingan

Boshqa holatda esa DXX Sirdaryo viloyati bo‘yicha boshqarmasi xodimlari tomonidan IJQK departamentining hududiy boshqarmasi bilan hamkorlikda Boyovut tumanida o‘tkazilgan tezkor tadbirda X.D. (1993-yilda tug‘ilgan) o‘zining 2018-yilda tug‘ilgan o‘g‘lini 16 ming dollarga sotgan vaqtida ashyoviy dalillar bilan ushlangan

Qayd etilishicha, hozirda har ikki holat yuzasidan jinoyat ishi qo‘zg‘atilib, tergov harakatlari olib borilmoqda.