Samarqand viloyatining Oqdaryo tumanida uch kunlik chaqalog‘ini 50 million so‘mga sotib yubormoqchi bo‘lgan ayol 5 yil-u 6 oyga ozodlikdan mahrum etildi. Bu haqda “Sevimli” telekanalining “Zamon” informatsion dasturida xabar berildi.
Ma’lum qilinishicha, turmushidan ajrashgan ayol boshqa bir yigitdan homilador bo‘lib, uni yaqinlaridan yashirishga uringan. Tug‘ilajak farzandini Samarqand tumanida yashovchi ayolga 50 million so‘mga sotishga kelishgan. 5-iyun kuni ayol uch kunlik qiz farzandi uchun kelishilgan pullarni olayotganida ushlangan.
Sudda ayol aybini to‘liq tan olib, qilmishidan pushaymonligini bildirgan. Sud Jinoyat kodeksining 135-moddasi 3-qismi “a” bandi (18 yoshga to‘lmagani aybdorga ayon bo‘lgan shaxsga nisbatan sodir etilgan odam savdosi) va 57-moddasiga (yengilroq jazo tayinlash) asosan ayolni 5 yil-u 6 oy muddatga ozodlikdan mahrum qildi.
Izoh (0)