“Nadomat” loyihasining navbatdagi suhbatdoshi ayni damda 21-sonli ayollar koloniyasida jazo muddatini o‘tamoqda. U O‘zbekiston Respublikasi Jinoyat kodeksining 135-moddasi 3-qismi “a” bandi bilan aybdor deb topilib, 3 yilga ozodlikdan mahrum qilingan.
Mahkuma — 27 yoshda. U yangi tug‘ilgan chaqalog‘ini 90 millionlik kreditini qoplab berish evaziga begona insonlarga sotayotgan paytda qo‘lga olingan.
— Oilada bitta qizman, uch ukam, ota-onam bor edi. Turmush o‘rtog‘im, qizim bilan tinch-totuv yashardik. Otam 2-guruh nogironi, sog‘lig‘i yomonlasha boshlagach, onamda ham saraton kasalligi boshlandi. Ota uyimga borib onamning parvarishiga vaqt ajratganim orqasidan oilamda tushunmovchiliklar kelib chiqdi. Shu orada onam vafot etdi. Oilaviy janjallar borgan sari ko‘paydi, chidolmay oxiri ajrashdim, — deydi mahkuma.
— Ajrashgan paytim 3 oylik homilador edim. Erimning farzand mendan emas, ko‘chadan orttirgansan degan gaplaridan tushkunlikka tushib qolgandim. Abort qilish fikri keldi, lekin sharoitimni biladigan bir ayol bor edi. Opasi 16 yildan beri farzand ko‘rolmayotgan ekan, farzandim tug‘ilgach, sotib olishini aytdi. O‘zim kvartirada yashardim, yana onamdan qolgan kreditlar, qarzlar bor edi. Farzanding yaxshi sharoitda yashaydi, yeb-ichishi yaxshi bo‘ladi, universitetda o‘qiydi, degan gaplariga ishonib bu jinoyatga rozi bo‘ldim, — deydi u.
“Qizim tug‘ilgach, hech kimga bergim kelmadi, bermayman deb qat’iy qaror qildim. Ukalarim xabar olib turishdi, lekin tug‘uruqxonada yolg‘iz qolib ketdim. Qanday ism qo‘yish haqida maslahatlashish uchun yaqinlarimdan hech kim yo‘q edi. O‘zim unga Dunyo deb ism qo‘ydim. Turmush o‘rtog‘imga qo‘ng‘iroq qilsam, bolani tan olmadi. Tushkunlikka tushib qoldim. Kreditlar va uy-joy qilishim kerakligi sabab moddiy ehtiyoj ustun keldi. Menga 90 million so‘m va’da qilishdi, jinoyatni baribir jazosi bor ekan — qo‘lga tushdim”.
— Kichkina qizimni oxirgi marta uxlab yotganda ko‘rganman, yig‘lamasdi, beozorgina qizcha edi. Qolgani esimda yo‘q. Tergov jarayonida faqat rasmini ko‘rdim, shifokorlar nazoratida ekan. Hozir katta qizimga amakimning oilasi qaraydi. Bilaman, onam hayot bo‘lganida bunday qilishimga yo‘l qo‘ymasdi. Jazo muddatim tugagach albatta qizimni qaytarib olaman, ikkisini ham o‘zim katta qilaman. Ayollar faqat o‘zining kuchiga ishonishi kerak, yo‘ldan adashgandan keyin bari kech bo‘ladi, bu yillar qaytib kelmaydi, — deydi mahkuma.
Izoh (0)