Toshkent viloyatida bir yoshli o‘g‘lini 9 ming dollarga sotmoqchi bo‘lgan er-xotinga hukm o‘qildi. Bu haqda Toshkent shahar sudi ma’lum qildi.
Ma’lum qilinishicha, I.S. ismli fuqaro 2019-yil 17-iyun kuni soat 14:00 larda o‘zining shar’iy nikohida bo‘lgan xotini T.G. bilan oldindan til biriktirib, 2018-yil 26-oktabr kuni tug‘ilgan o‘g‘lini sotib yubormoqchi bo‘lgan.
Shu maqsadda Toshkent shahar Uchtepa tumanida joylashgan “Jiz-biz” deb nomlangan kafeda I.S. bilan kelishib, undan 9000 dollar olayotgan vaqtida ichki ishlar xodimlari tomonidan ashyoviy dalillar bilan qo‘lga olingan.
Er-xotinga nisbatan Jinoyat kodeksining 135-moddasi (odam savdosi) 3-qismi “a” bandi bo‘yicha jinoyat ishi ochilgan.
Ayolning so‘zlariga ko‘ra, u turmush o‘rtog‘i bilan ishsiz qolgani sabab farzandini parvarish qilishga qiynalgan. Shu sababli ular bolaning kelajagi uchun boshqa oilaga sotib yuborishga qaror qilgan.
Sud hukmiga ko‘ra, ona Jinoyat kodeksining 135-moddasi 3-qismi “g” bandi bilan aybdor deb topilib, 4 yilga; ota esa 5 yilga ozodlikdan mahrum etildi. Jazoni o‘tash muddati 2021-yil 2-fevraldan hisoblanishi ma’lum qilingan.
Bundan avval Toshkentda uch kunlik chaqalog‘ini 9 ming dollarga sotishga uringan ayolga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani hamda Navoiyda farzandini 85 mln so‘mga sotishga uringan er-xotin jinoyat ustida qo‘lga olingani haqida xabar berilgandi.
Izoh (0)