Go‘zal va nazokatli Nastenka hammadan ko‘proq baxtli bo‘lish va sevilishga haqli edi. Ammo hayot Natalya Sedixga ko‘p sinovlarni tayyorlab qo‘ygandi. Garchi u mashhur aktrisaga aylangan bo‘lsa ham hayoti o‘lim yoqasida qoldi, shafqatsiz xiyonatga chidadi va kinodagi karyerasini tark etishiga to‘g‘ri keldi. “Noviy ochag” nashri aktrisaning muvaffaqiyatga boy ko‘rinsa-da, ammo boshqalarnikidan tamoman farq qiladigan taqdiri haqida ma’lumot beradi.
4 yoshidan boshlab figurali uchishni o‘rgandi
Natasha o‘z yo‘lini 4 yoshidayoq tanlagan: o‘shanda u birinchi marta televizorda figurali uchish musobaqalarini ko‘rgandi. Tomosha qizni shunchalik hayratda qoldirdiki, u, albatta, figurali uchuvchi bo‘lishga qaror qildi. Uning ota-onasi ham uni bu qarorda qo‘llab-quvvatladi. Faqat Natashani figurali uchish bo‘limiga darhol qabul qilishmadi: u juda kichkina edi. Ammo u o‘zini yo‘qotmadi, jasorat bilan zalning o‘rtasiga chiqdi va murabbiy Tatyana Granatkina uchun haqiqiy tomosha uyushtirdi. Qizaloq maydonni aylanib chiqdi va televizor ekranida ko‘rgan harakatlarni takrorlashga urinib, oyoqlari bilan piruet yasadi. Murabbiy bunday qat’iyatdan hayratda qoldi va ta’sirlandi, natijada Natashani qabul qilishdi.
Balet tanlovi
Granatkina Natashaning raqs harakatlarini ko‘rib, figurali uchishda muvaffaqiyat qozonishini tushunib yetdi va unga “Bolshoy teatr”ning balet maktabiga kirishni maslahat berdi. Katta raqobatga qaramay, Natasha maktabga qabul qilindi. Unga hammasi yoqdi, lekin bir kuni uning ham tanlov qilishiga to‘g‘ri keldi: u bir vaqtning o‘zida ham balet bilan shug‘ullanib, ham Olimpiya o‘yinlarida qatnasha olmasdi. Natijada u baletni tanlaydi, chunki raqsga tushishni ko‘proq yaxshi ko‘rardi. Natalyaning ajoyib qobiliyati mutaxassislar tomonidan yuqori baholandi:
Maktab yillarida klassik raqsda faqat 5 baho olardim. O‘qishni tugatgandan so‘ng ular meni “Bolshoy teatr”ga olib ketishdi. Agar ishga qabul qilinmaganimda aniq bilaman, kasbimni o‘zgartirgan bo‘lardim. Men boshqa teatrda raqsga tushmasdim, deydi u.
Nastenka obrazini Nadejda Rumyanseva o‘ynashi mumkin edi
“Ayoz bobo”da Sedixning rol o‘ynashiga bilvosita sabab bo‘lgan narsa — bu balet: rejissor Aleksandr Rou uni “O‘layotgan oqqush” spektaklida ko‘rib, 15 yoshli balerinani o‘zining ertagiga taklif qildi, chunki unda haqiqiy Nastenkani ko‘rgandi. To‘g‘ri, Nadejda Rumyanseva ham kastingga taklif qilingandi, ammo Rou Natashani tanladi. Ammo balet maktabida Natasha juda ko‘p yoqimsiz narsalarni tinglashi kerak bo‘ldi: rahbariyat talabaning suratga tushishda ishtirok etishiga keskin qarshi edi, chunki bu uni asosiy darslardan chalg‘itardi. Iqtidorli qiz uchun uning ustozi Sulamif Messerer ruxsat so‘radi va Natasha suratga olish guruhi bilan Kola yarimoroliga jo‘nab ketdi. Suratga olish paytida u o‘zining birinchi muhabbatini uchratdi: Nastenkani o‘ziga rom etgan yigit Ivanushka rolini o‘ynagan Eduard Izotov edi.
“Ayoz bobo”ning muvaffaqiyati kutilganidan ham ortib ketdi, Natalya Sedix yulduzga aylandi. Keyin yana bir nechta filmda rollar ijro etdi. Agar uni “Bolshoy teatr”ga qabul qilishmasa, u VGIKga kirib, aktrisa bo‘lishga qaror qildi. Ammo u ilk urinishdayoq qabul qilindi va taqdiri o‘sha yerda belgilandi. U endi suratga tushishga harakat qilmas, bor vaqti va butun kuchini sevimli baletiga bag‘ishlardi.
Rashkchi “Otello” uni bo‘g‘ib o‘ldirishiga bir baxya qoldi
Balerina shaxsiy hayoti uchun ham vaqt ajratdi. Uning bir nechta o‘tkinchi munosabatlari bo‘lsa-da, turmushga chiqishga shoshilmadi: u baletga sodiq qolishni xohladi. Afsuski, keyinchalik balerina uchun deyarli fojiali yakunlangan voqea yuz berdi. Leningradda gastrol safarida “Samoviy qaldirg‘ochlar” filmiga musiqa yozgan bastakor Viktor Lebedev Natalyani sevib qoldi. Tanishuvning birinchi oqshomida Lebedev Natashaga bosim o‘tkazdi: uning maqsadga erishish niyatida o‘zini qo‘pol tutishi Natashani hayratda qoldirdi. Ertasi kuni u aybini yashirish uchun o‘zini butunlay boshqa odam sifatida ko‘rsatdi. Natasha u bilan uchrashishga rozi bo‘ldi, munosabatlar rivojlandi, u Lebedevni qanday sevib qolganini sezmadi ham.
Ammo balerinaning yangi ishqiy munosabatidan xabar topgan “sobiq” oshiqlardan biri Leningradga qarab yugurdi. Tashlab ketilgan erkak balerinaga yashirincha hujum qilib, uni bo‘g‘ib o‘ldirmoqchi bo‘ldi. Natasha juda qo‘rqib ketdi: u bo‘g‘ilayotganini his qildi. Uni faqat rashkchi “Otello”ning xotini bo‘lish va’dasi qutqardi. Natasha uning qo‘lidan chiqqach, Lebedevning oldiga qochib ketdi.
“Mehmon nikoh”
Bu voqealarning barchasi Natalyaning Lebedevga turmushga chiqishga rozi bo‘lishiga olib keldi. Ikki yil o‘tib, ular turmush qurdi, ammo bastakor birinchi xotini bilan ajrashishi kerak edi. Ularning birgalikda yashashi g‘alati edi. Natalya esa hayotini teatrsiz tasavvur qila olmasdi, shuning uchun u Moskvada qoldi. Viktor Lebedev Leningrad Badiiy akademiyasida dars bergani uchun shaharni tark eta olmadi. Uchrashuvlar kamdan-kam, ammo sog‘inchga boy bo‘ldi. Faqat juftlikning o‘g‘li Alyosha tug‘ilgandan so‘ng Sedix bir muncha vaqt hech qayerga ketmadi, eri bilan Leningradda qoldi. Ammo tez orada faqat ona, xotin va uy bekasi bo‘lish uning taqdiri emasligini his qildi, u chindan ham raqsga tushishi kerak edi. U yana teatrga qaytib, chaqalog‘ini onasi va yollangan enagaga ishonib topshirdi. Ba’zan u Leningradga kelar, ba’zida Viktor uning holidan xabar olib turardi. Bir kuni Natasha sevgilisi uchun kutilmagan sovg‘a tayyorlab, oldindan xabar bermasdan uning yoniga uchishga qaror qildi. Ammo balerina kutilmagan voqea ustidan chiqdi: u turmush o‘rtog‘ini xiyonat ustida ushladi.
“Men o‘sha paytda 35 yoshda edim, nafaqaga bir necha oy qolgandi. Nihoyat Sankt-Peterburgga ko‘chib o‘tishimni o‘ylab, sevinardim. Lebedev biroz sabr qilishi kerak edi. Qizig‘i shundaki, uning hisobi bo‘yicha sodir bo‘lgan hamma narsadan keyin go‘yoki men uni tashlab ketganman”, deydi aktrisa bu haqda.
“Men faqat o‘zimga ishonishga o‘rgandim”
Natalya Sedixning hayotida yana bir qancha tanlovlar bo‘ldi. Ammo u boshqa turmushga chiqmadi. Uning aytishicha, yolg‘izlikda o‘zini juda yaxshi his qiladi: u erkin va hech kimga hisob bermasdan xohlagan narsasini qila oladi. Katta teatrdagi karyerasi tugagandan so‘ng (balerinalar erta nafaqaga chiqadi), Mark Rozovskiy Natalyani “Nikitskiy darvozalarida” teatriga taklif qildi va keyin u o‘zining aktyorlik salohiyatini anglab, yana bir nechta filmlarda rol o‘ynadi. Ehtimol, uning taqdiri kimgadir achinarli tuyulishi mumkin: aslida Sedix balet uchun hamma narsasi — kinodagi karyerasi, shaxsiy hayotini qurbon qildi. Lekin u o‘zini baxtli deb biladi, umrini “Bolshoy teatr”ga bag‘ishlagan yillaridan hech qachon afsuslanmaydi.
“Men faqat o‘zimga ishonishga odatlanganman. Shunda hech kim menga xiyonat qila olmaydi, zarar yetkaza olmaydi”, deydi nazokatli Nastenka.
Izoh (0)