Sirdaryo viloyati Guliston tumanida ona 1 yoshli farzandini sotmoqchi bo‘lgani aniqlandi. Bu haqda viloyat Ichki ishlar boshqarmasi “Daryo”ga xabar qildi.
Qayd etilishicha, Sirdaryo viloyati IIB va Iqtisodiy jinoyatlarga qarshi kurashish departamentining viloyati boshqarmasi hamda DXX viloyati boshqarmasi xodimlari hamkorlikda Guliston shahar hududida tezkor tadbir o‘tkazgan. Unda Guliston shahrida yashab kelayotgan fuqaro O.U (1996-yilda Sirdaryo viloyati Xovos tumanida tug‘ilgan) o‘zining 2021-yil 3-iyun kuni tug‘ilgan farzandi O.SH.ni o‘n sakkiz yoshga to‘lmaganini va ojiz ahvoldaligini bila turib, tadbirga jalb qilingan “xaridor” fuqaro M.G.ga 15 ming dollar evaziga sotgan vaqtda ushlangan. Undan kimyoviy ishlov berilgan pullar daliliy ashyo sifatida olingan.
Holat yuzasidan Jinoyat kodeksining 135-moddasi 3-qismi “a” bandi (o‘n sakkiz yoshga to‘lmaganligi aybdorga ayon bo‘lgan shaxsga nisbatan sodir etilgan odam savdosi) bilan jinoyat ishi qo‘zg‘atilgan. Unga nisbatan qamoq ehtiyot chorasi qo‘llangan.
Bundan oldin Toshkent viloyatida bir yoshli o‘g‘lini 9 ming dollarga sotishga uringan er-xotinga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani hamda Navoiyda farzandini 85 million so‘mga sotishga uringan er-xotin jinoyat ustida qo‘lga olingani haqida xabar berilgandi.
Izoh (0)