Samarqandda 8 oylik chaqalog‘ini 20 ming dollarga sotishga uringan er-xotin qo‘lga olindi

Jinoyat ishlari bo‘yicha Samarqand shahar sudida farzandini 20 ming dollarga sotmoqchi bo‘lgan ota-ona va ularga xaridor topib bergan dugonasiga nisbatan hukm o‘qildi. Bu haqda Oliy sud matbuot xizmati xabar berdi.

Qayd etilishicha, Qarshidagi universitetlardan birining talabasi bo‘lgan 22 yoshli qiz Telegram guruhlariga buyragini sotish haqida e’lon joylashtirib, xaridor izlagan. E’lon orqali u bilan tanishgan Aziz ismli samarqandlik yigit qizni buyragini sotish fikridan qaytargan.

Onamning o‘t qopida toshlar bor, uni davolatish, kontraktimni to‘lash uchun buyragimni sotmoqchiman, deb yozdim, — deydi ayblanuvchi.

Yigit ko‘pdan beri bola asrab olish niyatida ekanini aytib, yordam bersa, 20 ming dollar ishlab olishga qiziqtirgan. Shundan so‘ng qiz o‘zi bilan oshxonada ishlovchi ofitsiant dugonasiga bola asrab olmoqchi bo‘lgan odamning taklifini yetkazgan. Qiz bola uchun 10 ming dollar berishini aytib, qolgan 10 ming dollarni o‘ziga olib qolmoqchi bo‘lgan.

Hammadan oilali ekanini yashirib yurgan sherigi farzandini sotishga rozi bo‘lgan. 8-aprel kuni e’lon muallifi bolasini sotishga ko‘ndirgan dugonasi, uning turmush o‘rtog‘i bilan Samarqandga borgan.

Farzandimizni boqa olmadik, qiynaldik, yaxshi oilaga berish maqsadida Samarqandga keldik… Biz kvartirada turardik, to‘lashga sharoitimiz bo‘lmadi. Pulga uy olmoqchi edik, farzandimizni qaytarib berishsa bo‘ldi, — deydi erkak.

Shu kuni shaharning “Registon” mahallasida 8 oylik qizchani 20 ming dollarga sotish vaqtida qo‘lga olingan.

Sud hukmi bilan otasi 6 yil, onasi esa 3 yil muddatga ozodlikdan mahrum etildi. O‘rtada vositachilik qilmoqchi bo‘lgan qashqadaryolik qizga esa 5 yil muddatga ozodlikdan mahrum etish jazosi tayinlandi.

Bundan oldin Toshkent viloyatida bir yoshli o‘g‘lini 9 ming dollarga sotishga uringan er-xotinga sud hukmi o‘qilgani, Samarqandda ayol uy olish uchun 6 yoshli o‘g‘lini 6 ming dollarga sotmoqchi bo‘lganida qo‘lga olingani hamda Navoiyda farzandini 85 million so‘mga sotishga uringan er-xotin jinoyat ustida qo‘lga olingani haqida xabar berilgandi.