Oliy Majlis Qonunchilik palatasining majlisida Vazirlar Mahkamasining “O‘zbekiston — 2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturining 2024-yil yakunlari ijrosi yuzasidan hisoboti muhokama qilindi.
Bosh vazir o‘rinbosari Jamshid Qo‘chqorovning axborotiga ko‘ra, 2024-yil yakunida yalpi ichki mahsulotning o‘sishi o‘tgan yilga nisbatan 6,5 foizni tashkil qilgan.
“Davlat byudjeti daromadlari 274,4 trillion so‘mga yetib, 18,4 foizga ko‘paydi. Yillik inflyatsiya darajasi 9,8 foizni tashkil etdi”, dedi Qo‘chqorov.
Taʼkidlanishicha, xorijiy investitsiyalar hajmi avvalgi yilga nisbatan qariyb 1,6 foizga ko‘payishiga erishilgan. Eksport ilk bor 27 milliard dollarga yetgan. Tog‘-kon, neft-gaz, kimyo, qishloq xo‘jaligi sohalarida investitsiyalar hajmi ikki barobar ko‘paygan.
Taʼlim tizimini yangi bosqichga ko‘tarish maqsadida 76 foiz bolalar maktabgacha taʼlim bilan qamrab olingan. 115 ta nodavlat umumiy o‘rta taʼlim tashkiloti tashkil etilgan. Oliy taʼlim muassasalarida 91 ta talabalar turar joylarini barpo etish loyihasi amalga oshirilgan.
Aholini tibbiy jihatdan qo‘llab-quvvatlash maqsadida 40 yoshdan oshgan 10 milliondan ortiq aholi hamda 8 mln 162 ming nafar bolalar ommaviy skrining tekshiruvidan o‘tkazilgan. Xotin-qizlarning huquq va manfaatlarini taʼminlash maqsadida 197,7 ming nafar xotin-qizga 3,3 trln so‘m kredit ajratilgan, 548,8 ming nafarining bandligi taʼminlangan.
“Yashil makon” umummilliy loyihasi doirasida respublika bo‘yicha 225,9 mln tup daraxt va buta ko‘chatlari ekilgan, yashil bog‘lar soni 444 taga yetkazilgan. Muhokamalar yakunida Vazirlar Mahkamasining hisoboti maʼqullanib, hukumatning tegishli faoliyati samaradorligini oshirishga qaratilgan takliflar aks etgan tegishli qaror qabul qilindi.
Avvalroq 2024-yilda O‘zbekiston yalpi ichki mahsuloti 115 mlrd dollarga yetgani xabar qilingandi.
Statistika agentligi maʼlumotlariga ko‘ra, 2024-yil yakunida O‘zbekiston aholisi soni 37 million 543 ming nafardan ortgan. Shunda YIM miqdori aholi jon boshiga kamida 3 ming dollardan to‘g‘ri keladi.
2023-yil noyabrda 2024-yilgi iqtisodiy o‘sish 5,6-5,8 foiz atrofida bo‘lib, 1,3 kvadrillion so‘mga yetishi prognoz qilingandi.
Izoh (0)