Mongoliyaning aholi jon boshiga yalpi ichki mahsuloti 2021-yildan qariyb ikki baravar ko‘payadi, 2025-yilda esa 8000 dollarga yetadi. Bu haqda mamlakat bosh vazir Luvsannamsrain Oyun-Erdene boshchiligida byudjet siyosatiga bag‘ishlab o‘tkazilgan uchrashuvda moliya vaziri Boldin Javxlan ma’lum qildi.
Mongoliyaning 2022-yildan 2025-yilgacha bo‘lgan davrda eksport ko‘rsatkichlari 63,3 milliard dollarga yetadi va aholi jon boshiga yalpi ichki mahsulot deyarli ikki barobarga oshadi – 2021 yildagi 4657 dollardan 2025 yilda 8 ming dollargacha. Shu bilan birga, Moliya vazirligi kelasi yil byudjetini qisqartirishning uchta variantini o‘rganmoqda, dedi moliya vaziri.
Bosh vazir kelgusida defitsitsiz byudjetni qabul qilishga e’tibor qaratish lozimligini, bunda asosiy daromad hanuzgacha foydali qazilmalardan, birinchi navbatda, ko'mir qazib olish va eksport qilishdan kelayotganini eslatdi.
“Dunyoda ko‘mirdan voz kechish va yashil iqtisodiyotga o‘tish tendentsiyasi mavjud, shuning uchun biz ko‘mir eksporti qisqarishiga e'tibor qaratishimiz kerak”, dedi Mongoliya hukumati rahbari.
O‘zbekistonda YIM qancha?
2023-yilda O‘zbekiston yalpi ichki mahsuloti (YIM) ilk bor 1 kvadrillion 66 trillion 569 milliard so‘mni tashkil etdi. Bu haqda Statistika agentligi hisobotida ma’lumot berilgan.
O‘tgan yilda mamlakat YIM hajmi 6 foiz o‘sib, 90,9 milliard dollarga (o‘rtacha almashuv kursi 11,737 so‘m) yetdi. Bu raqam aholi jon boshiga hisoblaganda 2,5 ming dollardan to‘g‘ri keladi.
Shuningdek, Statistika agentligining xabar berishicha, 2024-yilning yanvar–iyun oylari yakunlariga ko‘ra, aholi jon boshiga hisoblangan yalpi ichki mahsulot hajmi 15 347,9 ming so‘mni (yoki 1 221,3 AQSH dollari ekvivalentida) tashkil etgan.
Izoh (0)