Vazirlar Mahkamasining “Bojxona yig‘imlari stavkalarini tasdiqlash to‘g‘risida” qarori qabul qilindi. Bu haqda Bojxona qo‘mitasi matbuot xizmati xabar berdi.
Qaror bilan quyidagilarni nazarda tutgan holda Bojxona yig‘imlari stavkalari tasdiqlandi:
- tovarlarning bojxona rasmiylashtiruvi uchun yig‘imlar miqdori bojxona organlari tomonidan harakatlarni amalga oshirish bilan bog‘liq bo‘lgan xarajatlarning taxminiy qiymatidan kelib chiqib belgilanadi;
- tovarlarni “eksport” va “import” bojxona rejimlariga rasmiylashtirish uchun undiriladigan bojxona yig‘imlari stavkalari o‘zaro muvofiqlashtirildi;
- bojxona organlarining ish vaqtidan tashqari bojxona rasmiylashtiruvi uchun yig‘im miqdori 8 barobarga kamaytirildi. Yaʼni, BHMning 2 baravaridan 25 foiziga tushirildi;
- bojxona hududida va hududidan tashqarida qayta ishlash bojxona rejimlarida undiriladigan yig‘im miqdori 2 barobarga pasaytirildi;
- dastlabki deklaratsiyalash amalga oshirilganda undiriladigan yig‘imga 20% miqdorida chegirma taqdim etiladi;
- tranzit bojxona rejimi uchun BHMning 25 foizi miqdorida yig‘im belgilandi;
- xalqaro kuryerlik jo‘natmalarining 1 kg uchun BHMning 2 foizi miqdorida yig‘im belgilandi.
Mazkur qaror rasmiy eʼlon qilingan sanadan eʼtiboran 3 oydan so‘ng kuchga kiradi.
Izoh (0)