Amerikalik aktyor Silvestr Stallone Nyu York shtatining nufuzli East Hampton hududidan deyarli 25 million dollarga yangi uy sotib oldi. Bu ko‘chmas mulk aktyorning uch qizi — Sofiya, Sistin va Skarlet uchun xarid qilingan. New York Post nashrining yozishicha, bitim to‘liq naqd pul evaziga amalga oshirilgan.
Xarid qilingan ushbu mulk ilgari mashhur interyer dizaynerlari Fibi va Jeyms Maykl Xovardlarga tegishli bo‘lgan. Ular xonadonni 2021-yilda 6,4 million dollarga sotib olib, McAlpine Tankersley Architecture byurosi yordamida kapital ta’mir o‘tkazgan. Oddiy kottej to‘liq qayta qurilib, keng va zamonaviy qarorgohga aylantirilgan.
Bundan tashqari, Stallone Florida shtatidagi Palm-Bich tumanida 35 million dollarlik hashamatli qarorgohga egalik qiladi.
Xonadon haqida batafsil
Uy Ist Hempton (East Hampton) ning eng mashhur hududlaridan birida, Atlantika okeanidan bor-yo‘g‘i bir mil narida joylashgan. 40 sotix maydonli, darvozalar bilan o‘ralgan yer professional landshaft dizayni bilan bezatilgan.
Hovlida asosiy uy, ochiq hovuz, spa zonasi va ayvon mavjud. Shuningdek, ikki mashinaga mo‘ljallangan alohida garaj ham joylashgan.
Uyning umumiy maydoni 1 100 metr kvadratni tashkil qiladi. Unda 8 ta yotoqxona, 10 ta hammom mavjud bo‘lib, har biri dizaynerlik mebellari va san’at asarlari bilan bezatilgan. Uch qavatli binoda zamonaviy lift ham o‘rnatilgan.
Ichki interyer ikki qavatli zaldan boshlanadi: bu yerda yoysimon shakldagi zinapoya joylashgan. Mehmonxona markazida Londonning Jamb firmasiga tegishli vintaj uslubidagi kamin joy olgan. Pol qoplamasi oqartirilgan eman daraxtidan ishlangan.
Ovqatlanish xonasi firuza rangda bezatilgan. Oshxona esa yuqori darajadagi professional texnika: qimmatbaho Lacanche plitasi, katta stol va alohida nonushta zonasi bilan jihozlangan.
Shuningdek, oilaviy mehmonxona, bilyardxona va uy kinoteatri ham mavjud.
Oila uchun sarmoya
Manbalarga ko‘ra, Stallone bu uyni turmush o‘rtog‘i, sobiq model Jennifer Flavin bilan birga aynan qizlari uchun xarid qilgan. Qizlaridan ikkitasi yaqinda Los Anjelesdan Nyu Yorkka ko‘chib o‘tgan, uchinchisi esa Mayami universitetida tahsil olmoqda.
Oilaparvarligi bilan mashhur bo‘lgan aktyor doimiy ravishda qizlariga har ishda yordam berishga harakat qiladi. Ijtimoiy tarmoqlarda Stallonening oilasi bilan tushgan suratlari tez-tez uchrab turadi. Bu yangi qarorgoh ham farzandlariga qulay va xavfsiz yashash muhitini yaratishga qaratilgan navbatdagi sarmoya sifatida baholanmoqda.
Izoh (0)