Work and Travel dasturi orqali Germaniyaga borgan va qiyin moliyaviy ahvolda qolgan Qoraqalpoq davlat universitetining 14 nafar talabasiga amaliy yordam ko‘rsatildi. Bu haqda “Dunyo” axborot agentligi xabar bermoqda.
Ma’lum qilinishicha, talabalar tashkiliy masalalarda yo‘l qo‘yilgan ba’zi kamchiliklar sababli safarning birinchi kunidan rejalashtirilgan manzil va ish joyiga yetib bora olmagan hamda yotoqsiz qolgan.
Talabalar diplomatlar va Frankfurt Mayn shahridagi faol vatandoshlar ko‘magida Bosh konsulxonaga olib kelingan.
Ta’kidlanishicha, ishlash va sayohat qilish maqsadida Germaniyaga kelgan mazkur talabalar bilan muammolarni yuzaga kelish sabablari, mahalliy ish beruvchi tomonidan mehnat shartnomasini bajarilishi holatlari bo‘yicha suhbat o‘tkazilgan. Ularga Germaniyada bo‘lish qoidalari tushuntirildi, o‘z xavfsizliklarini ta’minlash, shaxsiy mulk va hujjatlarini ehtiyot qilishlari yuzasidan tegishli choralar ko‘rishlari lozimligi aytib o‘tilgan.
“Moliyaviy jihatdan qiyin ahvolda qolgan talabalarga tezkorlik bilan yordam ko‘rsatish maqsadida O‘zbekiston Migratsiya agentligi bilan har bir talaba belgilangan me’yorda kunlik xarajatlar uchun zarur mablag‘ bilan ta’minlandi va mehmonxonada yashash xarajatlarini qoplab berish yuzasidan agentlik bilan kelishib olindi. Shuningdek, talabalarga Frankfurt Mayn shahridan vaqtincha yashab turishlari uchun mehmonxonadan joy olishda amaliy yordam ko‘rsatildi”, deyiladi xabarda.
Qayd etilishicha, vaqtincha ish bilan ta’minlashda vositachilik qilgan Germaniyaning Nova Agency kompaniyasi mas’ul xodimlari bilan kechgan muloqotda yuzaga kelgan muammolar muhokama qilingan.
2023-yilda ishlash maqsadida Germaniyaga ishlash uchun borib sarson bo‘lib yurgani 300 ga yaqin yoshlar bir necha kun vokzalda tunagani haqida xabarlar tarqalgandi.
Keyinchalik maʼlum bo‘lishicha, Turon World Cooperation xususiy bandlik agentligi MCHJ vakillari o‘zlariga tanish bir qator tashkilotlar bilan hamkorlikda 2023-yilning may—iyun oylarida Work and travel dasturi orqali Germaniyaga 102 nafar talabani jo‘natgan, ammo Germaniyaga yetib borgan talabalarni ish bilan taʼminlashda muammolar yuzaga kelgan.
2024-yilning sentyabrida o‘zbekistonliklar uchun Germaniyaga migratsiya masalasida bir qator yengilliklar ishlab chiqilayotgani ma’lum qilingandi. O‘sha yili Samarqandda bo‘lib o‘tgan O‘zbekiston—Germaniya oliy darajadagi muzokaralari natijasida bir qator hujjatlar imzolangandi. Ular orasida “Migratsiya va mobillik sohasida har tomonlama sheriklik to‘g‘risida” hukumatlararo bitim ham bor edi.
O‘zbekiston oliy o‘quv yurtlari va kasb-hunar kollejlarining diplomlari Germaniyada tan olinishiga erishish ham rejalashtirilmoqda.
Izoh (0)