G‘azo janubidagi yordam tarqatish markazida 7-iyun kuni g‘azoliklar Isroil harbiylari tomonidan o‘qqa tutildi. Oqibatda 6 kishi halok bo‘ldi, yana bir necha kishi jarohatlandi. Bu haqda BBC xabar berdi.
Odamlar 7-iyun kuni ertalab oziq-ovqat olish maqsadida yordam punktiga kelganlarida otishma yuz bergan. Guvohlardan biriga ko‘ra, g‘azoliklar voqea joyiga yaqinlashmoqchi bo‘lganida isroilliklar ularga qarata o‘t ochgan. Isroil harbiylari ularga “tahdidli tarzda yaqinlashgan gumonlanuvchilarga ogohlantiruvchi” o‘q uzganini bildirgan.
Shu haftaning o‘zida yordam punktlarida o‘nlab falastinliklar halok bo‘lib, yuzlab odamlar yaralangan. AQSH va Isroil tomonidan qo‘llab-quvvatlanadigan G‘azo gumanitar jamg‘armasi ko‘p sonli olomon bilan ishlash va xavfsizlikni yanada yaxshilash uchun o‘z faoliyatini to‘xtatganini aytgan.
Jamg‘arma 7-iyun kuni HAMASning to‘g‘ridan-to‘g‘ri tahdidlari tufayli oziq-ovqat tarqata olmaganini ma’lum qilgan. Guruh esa buni rad etgan.
Izoh (0)