Italiyalik musiqachi, kinoaktyor, estrada xonandasi, bastakor, jamoat arbobi, 87 yoshli Adriano Chelentano hozirda katta ekran, sahna va kameralardan uzoq joyda yashaydi. Ammo paparatsilar afsonaviy aktyorni ko‘rib qolib, uni suratga olishga muvaffaq bo‘ldi.
Italiyaning Primo Ascolto nashri Adriano Chelentanoning yangi suratini o‘zining ijtimoiy tarmoqdagi sahifasida namoyish qildi. Aktyor mashinasida o‘tirgan holda kameraga tushgan: Adriano suratga tushayotgan vaqtda jurnalistga tabassum qildi va obyektivga qo‘l silkib qo‘ydi.
Internet foydalanuvchilari aktyorning tashqi ko‘rinishidan hayratda qolishdi: “Keksaygan bo‘lsa-da, deyarli o‘zgarmagan”, “Qanday ko‘rkam inson”, “Uning tabassumini ko‘rib, xursand bo‘ldik”, “Afsonaviy aktyor” kabi izohlar qoldirdi.
Chelentano uzoq yillardan beri Komo ko‘li yaqinidagi kurort hududida joylashgan hashamatli uyida yashaydi. U aktyorlik faoliyatini tugatish qarorini 1994-yilda qabul qilgan. So‘nggi marta u ekranlarda 1992-yilda — “Jekpot” filmida chiqqan.
Ma’lumot uchun, Adriano Chelentano 1938-yil 6-yanvarda Italiyada, Milan shahrida tug‘ilgan. U butun dunyo bo‘ylab taniqli bo‘lib, o‘zining ko‘plab filmlari va musiqiy ijodi bilan mashhur. Chelentano 1960-yillarda italyan kino va musiqasining yirik yulduzlaridan biriga aylangan.
Ilk aktyorlik faoliyatini 1959-yilda boshlagan va tezda Italiya va butun dunyoda yulduzga aylangan. Uning eng mashhur filmlari orasida “Qaysarning quyilishi” (1979), “Shirin hayot” (1960), “Serafino” (1968), “Yuppi Du” (1975) va “Jekpot” (1992) kabi komediya va drama janridagi filmlar mavjud.
Izoh (0)